BUS TERMINALS IBALHIN UNA
Tungod kay ang mga siyudad sa Sugbo ug Mandaue ubos gihapon sa enhanced community quarantine (ECQ), ang mga bus terminal kasamtangang ibalhin sa Talisay City sa habagatan ug Consolacion sa amahinan.
Atol sa meeting ni Cebu Provincial Governor Gwendolyn Garcia sa tanang mga mayor sa probinsya niadtong Biyernes, Mayo 15, 2020, niingon si Garcia nga temporaryong ipahiluna ang Cebu South Bus Terminal sa Talisay City samtang ang Cebu North Bus Terminal adto sa Consolacion kon ubos na ang probinsya sa general community quarantine karong Mayo 20,2020.
Ang CSBT gihimo karon nga bagsakan center sa tanang mga produkto gikan sa lalawigan sa Sugbo, sama sa mga utanon.
Ang Land Franchising and Regulatory Board (LTFRB) nibutyag sa miaging adlaw nga dunay 111 ka mga bus nga modagan sa amihanan ug 200 sa habagatan kon mag GCQ na ang Lalawigan sa Sugbo.
Kon itandi sa “normal” nga panahon, mas mahal ang pletihan samtang naa pa sa quarantine ang Sugbo.
Katunga ra sa kapasidad ang makargang pasahero sa matag bus tungod sa social distancing.
Dugang ni Garcia nga niapilar ang Talisay City lakip na ang Minglanilla nga mopadayon sa ilang ECQ.
Apan sa suwat ngadto ni Garcia gikan sa Department of the Interior and Local Government (DILG), siya adunay gahom nga mopatuman pagpasaka o paglugway niini sa mga LGU ubos sa Lalawigan sa mga kasabotan sa Regional Inter Agency Task Force (R-IATF).
Gani, ang mayor sa Minglanilla nga si Elanito Peña mi-withdraw na sa iyang hangyo ug motuman na siya sa GCQ.
NABALAKA UNTA
Atol sa meeting sa mga mayor, si Talisay City Mayor Gerald Anthony Gullas Jr. daghan og kabalaka nga gipadangat tungod sa nasinati sa Tangke, Talisay City nga adunay 10 ka mga nagpositibo sa coronavirus disease (Covid-19)
Nihangyo si Gullas ngadto sa gobernador nga di una siya mopaubos sa GCQ ug mihangyo nga mag modified enhanced community quarantine (MECQ).
Di lang kay si Gullas ang nabalaka, apan apil ang ubang mga mayor.
Apan sigon ni Garcia nga panahon na gyud nga mo-move on ang probinsya gikan ECQ ngadto sa GCQ base sa mga analysis nga iyang gibuhat.
Bisan nagkasaka ang mga positibong kaso sa Covid-19, sigon ni Garcia nga di kini angay kahadlokan.
Gipakita niya nga di ingon ana kakuyaw nga makapatay ang Covid-19 itandi sa ubang sakit sama sa cardiovascular diseases.
Sa probinsya sa Sugbo, walo lang ang namatay tungod sa Covid-19 itandi sa 3.2 million nga populasyon.
Pasabot ni Garcia nga aduna lay tulo ka tawo matag usa ka milyon nga mga tawo tungod sa Covid-19.
Di susama sa cardiovascular
diseases nga 1,080 ang mamatay matag usa ka milyon ka tawo.
Matod ni Garcia nga di angay tan-awon kon pila ang nagpositibo, kon di pila ang nangamatay. "It doesn't mean nga positive ka, it is a death sentence,"
sigon ni Garcia.
Dugang ni Garcia nga sa tanang nagpositibo 80 porsyento
niini ang adunay mild symptoms ug asymptomatic.
"We cannot forever be doing this because we are putting everything aside especially our
economy here. Wala na, guba na kaayo," sigon ni Garcia.
Human sa meeting sa mga mayor, sa Facebook post ni Gullas, siya nipasabot nga nihangyo siya ni Garcia ug DILG nga ipaubos siya sa modified enhanced community quarantine tungod kay gusto sab siya nga ipadayon na ang panginabuhi sa iyang katawhan.
Dugang niya nga kon maaprobahan, ipadayon niya ang ECQ, apan kon di, ipaubos na niya ang iyang siyudad sa GCQ, sama sa ubang local government
unit sa probinsya sa Sugbo. Tungod niini, ipadayon gihapon ni Garcia ang iyang plano alang sa temporaryong mga terminal nga ihiluna sa Consolacion ug Talisay.
Wa pa hinuon matino asa ipahiluna ang mga bus terminal sa duha ka mga dapit.