126 NA KA PULIS GI-QUARANTINE

Natibhangan pag maayo ang mga sakop sa Cebu City Police Office (CCPO) human giquarantine ang mga personnel sa Pardo Police Station human lima sa ilang mga dinakpan positibo sa coronavirus disease (Covid-19).

Ang 32 ka mga sakop sa police station ingon man ang laing 16 ka personnel gikan sa Police Regional Office (PRO) 7 nga dugang unta sa ilang pwersa, gipang-isolate na karon sa tunghaan sa barangay.

Matod ni Police Major John Kareen Escober, hepe sa Pardo Police Station, kasagaran sa ilang mga piniriso nga nagpositibo nag-atubang og kaso sa illegal nga drugas.

Ang mao nga mga binilanggo naa na gibalhin sa usa ka pasilidad sa Cebu City Jail aron di makatakod.

Di hinuon tanang mga pulis sa station ang gi-quarantine. Duna pa siyay 29 ka mga personnel nga way contact sa mga binilanggo ug wa lang una ni paadtoa sa station.

“Katong mga personnel nako nga walay direct contact diri, wala moari sa opisina wala na to nako paari-a diri. Pero continue gihapon ang duty nila sa mga quarantine control point area,” matod ni Escober sa Superbalita Cebu.

Nagduda si Escober nga nakuha sa ilang dinakpan ang virus gikan sa mga tawo nga mo dalaw sa bilanggoan.

Niadtong Abril 28, mao ang labing daghan sila og nadakpan, duha niini nakuhaan og 4.2 kilo nga shabu. Nidawat pa sila og mga bisita. Niadtong Abril, nakasakmit og 4.2 kilo nga shabu ang buhatan sa usa sa ilang mga buy-bust, diin duha ang ilang nadakpan sa

Iyang giangkon nga ning nahitabo karon, lisod alang kanila ang pagtrabaho tungod kay naa lang sila sa sulod sa opisina, di mahimong maka gawas.

Gipakuhaan na usab silang tanan og swab sample alang sa Covid test. Hayan sa Lunes o Martes sunod semana ipagawas ang resulta.

“Limited man gud ang movement sa atong pulis basta ma-consider as PUM (person under monitoring). Dili na man ka function normally ang atong kapulisan gud. Limited na ang ilang contact sa mga tawo,” matod ni Escober.

Ang Cebu City Police Office nagpadala na hinuon og augmentation sa Pardo Police Station nga maoy mo-roving sa mga barangay nga sakop sa ilang huresdiksyon nga maoy mopatuman sa kahusay ug kalinaw.

Hinuon, ang mao nga mga pulis di makasulod sa station.

Moabot na sa 126 ka mga pulis ang gi-quarantine nga nahisakop sa upat ka police stations ubos sa CCPO. Sa Sawang Police Station, 36; Parian, 5; Pardo, 32; ug Carbon, 53.

GI-COVID

Moabot na sa 18 ka mga pulis nga sakop sa CCPO ang positibo sa Covid-19.

Sa 18 ka mga pulis, 16 niini ang gikan sa Sawang Calero Police Station samtang ang nadugang nga duha gikan sa Carbon Police Station.

Usa sa duha ka positibo sakop sa Carbon Police samtang ang usa gi-augment gikan sa PRO 7.

Matod ni Police Capt. Alvin Llamedo, hepe sa Carbon Police Station nga silang tanan ang anaa lang sa ilang estasyon gi-lockdown. Hinuon, walo sa iyang mga sakop gi-home quarantine tungod kay nanghangyo. "Ang duha niini mabdos. Naay medyo mitaas ang BP (blood pressure) mao na nga didto nalang sa ilang balay nato sila gipa kwarantin,"matod ni Llamedo.