Mangapil kita

Lugak na unta ang quarantine sa Dakbayan sa Sugbo. Niadtong Biyernes, niluwat og executive order si Mayor Edgardo Labella nga nagbutang sa dakbayan ubos sa modified enhanced community quarantine (MECQ). Ubos unta sa MECQ, gitugtan na ang mga tindahan nga nagbaligya og mga senina, pahumot, educational supplies sa pagbukas. Gitugot na usab unta ang outdoor exercise sama sa jogging ug biking.

Apan gibawi ni Labella sa Sabado ang iyang EO kay giuyonan sa Interagency Task Force (IATF) ang ilang hangyo nga ipabilin sa enhanced community quarantine (ECQ) ang Dakbayan sa Sugbo ug Mandaue. Ang Siyudad sa Sugbo duna nay kapin sa 1,700 ka mga kaso sa Covid samtang kapin sa 100 sa Dakbayan sa Mandaue.

Si Labella nipasabot nga gusto unang sutaon sa City Hall ang sitwasyon sa coronavirus disease (Covid-19) infections sa dakbayan una pa lugakan ang ECQ. Makuha lang kini pinaagi sa mass rapid diagnostic testing. Apan makaguol kay kadaghanan sa mga barangay di gani molabaw sa 10 porsyento ang nagpakuha og dugo alang sa rapid test.

Kon gusto kitang makalihok na nga luag, gikinahanglang mokooperar kita sa kagamhanan. Gikinahanglan nga magpakuha og dugo aron makakita ang kagamhanan sa unsay tinudanay nga sitwasyon sa Covid-19.

Ang resulta man gud sa rapid test maoy sukdanan ug basehanan sa Siyudad unsay buhaton. Mahulog ba nga usa kini ka hulagway, diin makita ang tanang mga dapit diin naa possible ang bagang mga kaso sa Covid-19. Kon wa kini nga hulagway, di makapataka si Labella sa pagpalugak sa ECQ.

Busa, kon ibalik man sa matag barangay ang rapid test, mangapil kita aron makatabang kita sa kagamhanan. Di lang ang kagamhanan ang atong gitabangan, ang ato usab nga kaugalingon ug mga minahal sa kinabuhi nga nag-antos na sa duha ka buwan nga pagpuyo sa balay.

Ipakita ang pagmahal, mangapil kita sa rapid test.