Covid test sa mga private employees

Human sa pagpahigayon og rapid mass testing sa mga lumolupyo nga gustong mapa-ubos sa tulo ka dagkong mga siyudad sa Metro Cebu, tinguha sa mga mayor ug sa Office of the Presidential Assistant for the Visayas (Opav) nga gipangulohan ni Secretary Michael Dino nga ang mga empliyado sa pribadong sektor mao na usab ang isunod sa di pa sila mobalik sa trabaho kon new normal na.

Ambot nganong ila gyud nga ipamugos kining rapid mass testing nga wala man ni klaro. Unsa may ilang basihan alang sa mga empliyado sa pribadong sektor? Naa bay balaod ani? Ang akong nabihaw-an nag-sponsor pa lang og balaodnon si Senador Risa Honteviros kabahin niini.

Lalisunon pa ni sa Kongreso.

Dali kaayong sabton ang katuyuan niining paghimong mandatory sa Covid-19 testing sa tanang mga trabahante nga mamalik sa trabaho. Para ni sa ilang kaluwasan. Ug way kuwestiyon alang sa higanteng mga kompaniya. Makahimo kaayo sila pag-abaga sa galastuhan sa testing. Apan kadtong mga gagmay lang nga mga negosyo, maka-afford kaha sila?

Apan alang sa micro and small scale businesses, sama anang gagmayng shops nga maoy labing daghan sa atong nasud, segurado kaha silang dunay ikakaya paggasto para sa ilang trabahante? Ug kon maglisud pagkuhag tabang kining mga negosyuha gikan sa gobiyerno kay gi-una ang mas tabangunon nga poorest of the poor, unsaon pagbalik sa negosyo ning maong mga kompaniya kon mo-abaga ba sila sa Covid testing sa ilang mga trabahante?

Si kinsa ang mogasto? Ang employer o ang mg empliyado? Tanan apektado sa enhanced community quarantine (ECQ). Ang mga kapitalista nanira sa ilang mga negosyo, nanghatag sa ilang mga empliyado og pabawon sulod sa duha ka buwan nga lockdown.

Dili dayon mabawi ang ilang lugi gumikan sa lockdown. Molanat pa kini og pipila ka tuig usa sila maka-recover. Ang mga empliyado sab igo lang gigasto sa pagkaon sa ilang pamilya ang kita ug nahurot na. Karon, pagastuhan na usab nato? Pilion lang siguro nato. Kadtong adunay symptoms mao lay ipaubos sa Covid test. I-quarantine lang siguro ang uban.

(bobbygnalzaro@gmail.com)