Giaway ko!

Kadtong mga bata pa kita, kon adunay manugsog nato o sa sinugsogay napildi ta, mosumbong dayon kita sa atong inahan o maguwang – kon dili siya ang nangaway – ug moingon: “Giaway ko!” Magpalaban dayon kita. Kon ang inahan pod napuno na sa purhisyo sa mga bata, moingon pod siya: “Inig-abot sa inyong amahan, bantay lang gyod mo. Makatilaw gyod mo!” Magpalaban pod ang pobreng inahan.

Natural kining magpalaban. Matag usa kanato adunay limitasyon sa kusog, sa pailob, sa enerhiya. Moabot na gani ang yugto nga, atubangan sa usa ka kalisdanan dili na gyod nato kaya, mangita kita og masumbongan nga mas kusgan pa sa reyalidad nga nagasamok kanato. Magpalaban ta.

Miingon si Jesus sa ebanghelyo: “Kon nahigugma kamo kanako, tumanon ninyo ang akong mga sugo. Ug ako mohangyo sa Amahan ug mohatag siya kaninyo og lain pang maghuhupay aron maanaa siya uban kaninyo hangtod sa kahangtoran”. Kining pulong “maghuhupay”, “parakleto” kini kon subayon ang orihinal nga Griyego. Kon hubaron ang pinulongang Griyego, “gitawag ngadto sa kiliran” ang gipasabot sa pulong. Ang parakleto diay gitawag ug nagbarog sa atong kiliran.

Ang Parakleto mao ang Espiritu Santo nga naghisgot sa iyang tahas sa dihang motupad siya kanato. Kon tuparan kita sa Espritu sa Dios aron kini panalipdan ta, dan-agan ta, tudloan ta, dasigon ta, ug uban pa. Mao nga lainlain ang paghubad sa Parakleto. Mahimong Maghuhupay, Manlalaban, Magdadasig, ug uban pa.

Mahinungdanon kaayo nga Binasi sa Mga Buat 8:5-8, 1417; Salmo 66; 1 Pedro 3:15-18; Juan 14:15-21 sangpiton gyod nato ang Espiritu Santo kay ang Parakleto kinahanglan tawgon gyod kay mao kini ang kahulogan sa “parkaleto”. “Umari ka Espiritu Santo,” moingon kita. Tawgon gyod nato Siya ug dili nato taligam-an kay sagad mas dali baya tang mosangpit kang Jesus, sa mga santos, ug sa Birhen Maria kaysa Espiritu sa Dios. Ang Amahan dili gyod mataligam-an kay ang tanang pag-ampo Kaniya man gyod gipunting ug padulong. Si Jesus, ang Anak, suod nato kay daghan kaayo tang makita nga larawan niya. Ang Espiritu Santo, tungod sa kinaiya sa iyang misyon, dali mahikalimtan.

Kining pagsangpit sa Espiritu Santo mahimong ipaagi diha sa Kristohanong katilingban. Mao kini ang nahitabo sa Mga Buhat sa mga Apostol. Sa dihang nadungog sa mga apostol sa Jerusalem nga nidawat sa pulong sa Dios ang mga Samaritano, gipaadtoan nila sila ni Pedro ug Juan aron ampoan sila. Ug dinhi nadawat nila ang Espiritu Santo. Kinahanglanon diay ang Simbahan isip sandayong sa pagdawat sa Espiritu sa Dios. Magpalaban usab kita sa Simbahan.

Ang magpalaban sa Manlalaban makabaton gyod og paglaum. Sa pulong pa ni San Pedro kinahanglan kita andam mohatag sa rason sa atong paglaum. Unsa may gibasihan sa maong paglaum? Mao kini ang kamatayon ni Jesus diha sa lawas nga gihatagan og kinabuhi diha sa Espiritu. Ang Manlalaban mohatag usab nato og kinabuhi sa panahon nga kita makasinati og kapakyasan, kahigwaos, kasalanan, ug uban pa.

Atubangan sa hulga sa Covid-19, nasangpit na ba nato ang Espiritu Santo aron labanan ta niya?