DILI MAKALIMTAN NGA BIRTHDAY GIFT

Singgit sa kalipay sa iyang higala ang nipukaw ni King Anthony Perez samtang siya natulog.

Alas 11 sa buntag niadtong Abril 29, wa damha ni King nga madawat niya ang sayo ug dili makalimtan nga birthday gift. Siya nakapasar sa Bar exam. Ang labing maayo nga balita gipahibawo sa iyang higala nga si Lorie Archival, kinsa nakasinggit sa kalipay nga si King nakapasar. Si Lorie apil usab sa mga nakapsar.

Wa katingog si King sud sa pipila ka minutos tungod kay wa siya makasabot sa iyang gibati.

“Gipangayo nako sa akong pag-ampo nga unta makapasar ko. Sayo gyud siya nga birthday gift sa Ginuo,” padayag ni King.

Kagahapon, Sabado, Mayo 16, gisaulog ni King ang ika-28 nga kasumaran sa iyang adlaw nga natawhan.

Bata pa si King, pangandoy na niya nga mahimong abogado.

Ganahan usab siya kaniadto nga ma-doktor apan mas nipatigbabaw ang iyang kagustohan nga manlaban sa korte.

“Bata pa ko di kaayo ko motan-aw og cartoons. Nakakita ko sa TV nga naay lawyer mo-appear sa korte, ganahan ko,” asoy ni King.

Wa siya magdahom nga sayo siya mahimo nga abogado.

Nagsugod siya og eskwela og abogasiya sa University of Cebu niadtong 2015, dihang siya usa pa ka reporter sa TV5.

Karon nga usa na ka abogado si King, plano niya nga ipadayon ang iyang adbokasiya isip tigpanalipod sa mga katungod sa kabataan.

Matod niya, iyang nakita nga dili kaayo prayoridad sa katilingban ang paghatag og importansya sa mga katungod sa kabataan.

Si King nagtrabaho karon sa Children’s Legal Bureau isip communications and advocacy officer.

Giangkon ni King nga grabeng kalisod ang iyang naagian sa wala pa niya makab-ot ang iyang pangandoy nga maabogado tungod kay nagtrabaho usab siya sa samang higayon.

Kinahanglan usab niya magmaintain sa iyang mga grado isip scholar sa Foundation for Liberty and Prosperity ni retired Supreme Court Chief Justice Artemio Panganiban.

Dinhi sa Sugbo, duha lang sila napili nga eskolar. Ang usa tinun-an sa abogasiya sa University of Cebu.

“Lisod ang mag-eskwela og Law. Kung naay panahon nga kapoy kaayo ka, mobalik ka og tan-aw sa imong tumong ug tinguha sa kinabuhi. Kung makahinundom ka unsay purpose nimo, nganong gibuhat na nimong butanga, makasabot ug ma-okay na ka,” dugang ni King.

Mapasalamaton si King sa grabeng suporta sa iyang pamilya ug mga higala sa pagkabot sa iyang pangandoy.

/ TAMPO ■ DOUBLE CELEBRATION: Wa magdahom si King Anthony Perez nga sayo siya mahimo nga abogado human makapasar sa Bar exam nga gipahigayon niadtong Nobiyembre sa miaging tuig. Kini iyang giisip nga sayo nga birthday gift gikan sa kahitas-an.