COVID-19 WALA MAKABABAG SA MISYON SA RCC

Taliwala sa hulga sa coronavirus disease 2019 (Covid-19), nagpadayon ang kampanya sa pagtabang sa mga bata nga adunay Congenital Heart Defects (CHD) pinaagi sa pagpahigayon sa Citrineland Virtual Run for Gift of Life.

Ang virtual run gipahigayon aron makatigom og pundo nga gamiton nga hinabang alang sa uyamot nga mga bata nga adunay sakit sa kasingkasing.

Pinasiugdahan sa Rotary Club of Cebu, ang kalihukan orihinal untang gikatakda karong adlawa sa Robinsons Galleria.

Apan gumikan sa pagkuyanap sa Covid-19, hayan naahat ang mga nagpasiugda nga mogamit na lang sa online aron maseguro ang kaluwasan sa tanang mga nahilambigit niini.

Usa ka anonymous donor misaad nga mohatag og kontribyusyon sa Gift of Life project fund kon moabot sa 250 virtual runners ang mosalmot sa kalihukan.

“Join now and give a child a second lease in life. If we reach at least 250 virtual runners who will post their accomplishments, an anonymous donor will make a generous contribution to the Gift of Life project fund,” pamahayag sa Rotary Club of Cebu Facebook page.

Libre ang pagsalmot sa virtual run ug abli kini alang sa tanang mga interesado.

Kinahanglang makompleto sa mga partisipante ang kategoriya nga apilan niini sulod sa Mayo 16 ug 17, 2020 gamit ang bisan unsa nga fitness applications. Ang mga kategoriya nga naglangkob sa virtual run mao ang 3-kilometer, 10K ug 21K.

Kon makompleto na ang tahas, ang partisipante kinahanglang mo-download sa virtual badge.

Human niini, kinahanglang i-post sa partisipante ang virtual badge kauban sa iyang hulagway sa ilang personal Facebook page unya i-tag ang Rotary Club of Cebu gamit ang hashtags #RunforGiftofLife #GOLI #CongenitalHeartDefects #RCCebu.

Ang virtual run usa sab ka pamaagi aron ipakatap nga puwede ra'ng matambalan ang sakit sa kasingkasing.

Ang pagpahigayon og fun run aron makatabang sa mga batang adunay sakit sa kasingkasing nahimo nang misyon sa Rotary Club of Cebu sa milabayng upat ka mga tuig.