PACQUIAO MISUGOD NA SA PAG-ENSAYO
Wala pa man tuod klaro kon kanus-a siya makabalik og away apan hinayhinay nang mibalik sa pag-training ang bugtong 8-division world boxing champion nga si Filipino icon Manny Pacquiao.
Sa video nga nakuha sa World Boxing News, nakita nga nagsukmagsukmag na si Pacquiao sa boxing bag sa iyang panimalay. Gihimo kini sa Pambansa ng Kamao ng Pilipinas taliwala sa kadaghan sa iyang gimbuhaton isip usa ka senador sa Pilipinas. Ang kasamtangang World Boxing Association (WBA) welterweight champion kasamtangang nakatutok sa pagtabang sa pagpakigbatok sa coronavirus disease 2019 (Covid-19).
Sa sayo pa, daan nang nagplano si Pacquiao nga moaway og balik karong Hulyo apan wala pa kini kaseguroan gumikan sa hulga sa Covid-19.
Hinuon wala mokompiyansa si Pacquiao ug mibalik na kini sa pag-ensayo aron i-andam ang iyang kaugalingong kon mahan-ay na ang eskedyul sa sunod niyang away.
Ubay-ubay ang pangalan nga naa sa listahan sa posibleng sunod nga makontra ni Pacquiao.
Naa ang retiradong si Floyd Mayweather Jr., International Boxing Federation (IBF) ug World Boxing Council (WBC) welterweight king Errol Spence Jr., World Boxing Organization (WBO) welterweight ruler Terrence Crawford, Mikey Garcia ug Danny Garcia.
Si Mayweather, kinsa milupig ni Pacquiao pinaagi sa unanimous decision niadtong 2015, mitataw nga dili na siya mobalik og away ning bag-uhay lang.
Apan dili gihapon kini angayang wagtangon sa listahan gumikan kay puwede pang mausab ang hunahuna niini.
Ning puntoha, ang adunay labing dakong poruhan nga mahimong sunod nga makontra ni Pacquiao mao si Crawford.
Ang kasamtangang promoter ni Crawford nga si Top Rank boss Bob Arum, kinsa kanhi naggunit ni Pacquiao, naglihok aron mapahigayon ang Pacquiao-Crawford bout sa Middle East diin dili tantong grabe ang hulga sa Covid-19.
Gipiyalan na ni Arum si boxing power broker Daniel Kinahan sa pagpangita og venue alang sa gikaintapang panagharong.
Plano ni Arum nga idungan ang Pacquiao-Crawford sa heavyweight unification bout tali nila ni Tyson Fury ug Anthony Joshua.
“Dan has been handling all of that, you know, major fights that we would like to do. Like for example a Pacquiao-Crawford fight, which Dan has been working on,” matod ni Arum sa interbyu sa IFL TV nga napatik sa www.boxingscene.com.
Kon dili madayon sa Middle East, ang opsyon ni Arum ipahigayon ang dakong mga away sa Macau.