Kanus-a mobalik ang ABS-CBN?

Excited na mo sa pagbalik sa ABS-CBN? O mas excited ka nga mogawas na sa inyong balay kay hapit na mahuman ang ECQ sa inyong probinsya?

Ako, none of the above. Unsa may atong kasiguroan nga luwas na ta sa virus nga wa pa man gihapoy tambal o bakuna ang Covid-19.

Ayaw mog kumpiyansa. Aw, naa man kaha moy minilyon ipatambal sa Covid?

Kadungog bitaw mo sa gisulti ni Presidente Duterte nga nahurothurot na ang pondo sa gobyerno. Kon magdugay pa ning problemaha bungkag lampinig gyud ta ani.

Pareho adtong unang kaso sa Covid nga natala sa Liloan. Nganong mag-positive man nga Covid-free man ang Liloan?

Mao nga dapat sirad-an gyud ang border bisan pa ubos sa GCQ o MECQ. Way pagawason o pasudlon gikan sa mga high risk nga lugar.

Kon mabdos ug ganahan adto magpa-prenatal ug manganak sa Cebu city nan balhin una og puyo aron dili maamong ang tibuok munisipalidad.

3RD WEEK SA JUNE Bahin sa kaso sa ABS-CBN, di nako mahibong kon makabalik ra ni ilang operasyon.

Klarong biktima ra sad ni sila. 2016 pa gud ni sila ni-apply og franchise renewal. Siyaro!

Kon kanus-a makabalik tingali adto na ni sa mga 2nd o 3rd week sa June.

Sa higayon nga mapasar kinahanglan ning ipublikar pa sa mga mantalaan sud sa 15 ka adlaw sa dili pa hingpit nga mahimong balaod.

Apan gahapon gibawi sa Kongreso ang ilang 2nd reading approval sa ABS-CBN franchise kay duna silay gipang-usab nga mga provision nga medyo wa kuno mahisubay sa konstitusyon.

Kon mapasar sa Kongreso ang 2nd reading karong semanaha, ang 3rd reading adto na sa sunod Lunes, Mayo 25. Ang last session sa Kongreso sa June 3 sa dili pa sila mo-break.

DAMAY SA KALAGOT Ako lang klaruhon nga dili ko pro-Kapamilya pero dili sad ko anti-Kapamilya.

Apan parte og mga artista motuo ko nga mas maayog breeding ang mga taga-GMA-7.

Kapila na kaha ko nauwawan tungod sa pagka-arogante sa ubang mga artista sa ABS-CBN. Utro na ilang mga staff nga feeling artista sad.

Maayo nang nakatilaw sad sila karon og tagam. Pero dili pud tingali makatarunganon nga hasta mga way labot atong idamay sa atong kalagot.