Tinuod nga parents
Dear Noy Kulas,
Maayong adlaw ninyo. Salamat nga wa mo moundang og balita kay kamo ang among sige basahon karong panahuna. Tawga lang ko og Merin, 45 years old. Guwang na unta ko, pero naa gihapon ni nakong problemaha bisan sa akong edad.
Sukad sa bata pa ko, nakahibawo na ko nga di ko anak sa akong giilang ginikanan karon. Pero wa sila mosulti kinsa ang akong parents kay wa ko mangutana bisan gusto kong makahibawo. Bisan minyo na ko karon wa gihapon ko kahibawo kinsa akong tinud-anay nga parents. Akong giila nga mga igsuon nag-treat hinuon nako nga ila kong kadugo.
Karon nga naa ra ko pirme sa balay kay way work ang among company, nagsige ko og utingkay sa Facebook. Karon naay usa ka tawo nga ni-chat nako nga nakaila siya sa akong parents. Iyang giestorya sa akoa nganong nabuwag ko sa akong tinud-anay nga parents ug naari ko sa Cebu. Na-curious ko og maayo kay duna siyay information nga gihatag nga matukma sa akong background kaniadto ug sa akong giilang parents. Wa kahibawo ani ang akong giila nga family. Unsa kaha akong buhaton, ako silang pahibaw-on aning tawo nga nisulti nako? Di kaha sila malain?
MERIN
Merin,
Wa may dautan kon mangita ka sa imong true parents or family. Maayo nang makahibawo ka kon unsa ug kinsa ka nga pagkatawo nga sa dugay nang panahon wa matubag ug nagpabilin nga tigmo alang nimo.
But sa di pa nimo ni buhaton, pakigsulti sa imong giilang parents kabahin sa imong pagkatawo kaniadto. Pangutan-a sila kay duna ka may katungod nga masayod sa imong kagahapon. Makasabot ra sila niana.Pahibaw-a usab sila kon unsa ang imong nahibaw-an pinaagi sa tawo nga nakig-chat nimo. Niana makahibawo sila nga duna ka nay initial nga nahibaw-an kon unsa ug kinsa ka.
Kon makab-ot nimo ni, mabutangan og closure ang imong mga pangutana kon unsa ug kinsa ka. Di lalim ang bation sa us aka tawo nga wa masayod sa iyang kagikan bisan tuod kon dunay uban nga nidawat na lang sa limitado nga kasayuran kon kinsa sila.
NOY KULAS