51 KA PASYENTE SA COVID SA LUZ MIULI
Ang Cebu City Government nipagawas og 51 ka asymptomatic Covid positive, nga ninggawas nga laboratory negative na sa ilang swab test sa Martes, Mayo 19, 2020 sa barangay isolation center (BIC), sa Barangay Luz, Dakbayan sa Sugbo.
Sila gipahinungdan sa City Government pinaagi sa paghatag og 25 kilo nga bugas para aduna silay konsumo sa ilang tagsa-tagsa ka pinuy-anan.
Si City Administrator Floro Casas Jr., nagkanayon nga ang maong kanhi mga pasyente dul-an og kapin na sa usa ka buwan nga nag-istar sa BIC sanglit nalangan og gawas ang mga resulta sa ilang swab test.
Ang labing edaran nga napositibo sa Covid usa ka babaye nga 81 anyos samtang 9-11 anyos ang labing bata.
Ang city administrator nipasabot nga gitagaan sila og konsumo sa mayor sanglit di pa makatrabaho ug way klaro nga income ang mga kanhi sa biktima sa Covid ug hinay pa usab ang ilang resistensiya.
Si Konsehal Dave Tumulak, kinsa nitabang og pasabot sa mga tawo sulod sa BIC sa Luz, niingon nga matag pasyente nga mag-negatibo, ibalik na ngadto sa komunidad bitbit ang ilang CHD certificate nga nagpamatuod mga sila Covid-19 negative.
Samtang si Barangay Kapitan Ronnie Sab-a nagpasalamat ngadto sa City Government, kinsa gikan sa unang adlaw nipabaha na kanila og tabang. "Atong sangpiton si Lord, every
now and then, kay siya ra gyud ang makatabang nato. Wa ko mag-expect sa akong pagkakapitan nga maabtan ani nga crisis ug nahimo kong kapitan tungod ninyo ug ni God. Kon naay problema, ako gyud na isangpit Niya kay dili ko tagaan og problema kon dili nato kaya," matod ni Sab-a atol sa mubo nga seremonyas.
Sa kinatibuk-an, ang dakbayan aduna nay 104 ka mga recovered
patient gikan sa Covid-19. Samtang adunay 17 ka bagong kaso sa Covid sa dakbayan sa Sugbo. Ang City Jail adunay 11, Mambaling (1) Pasil ( 1) Punta ( 1) ug 2 sa Suba base sa labing uwahing resulta nga nigawas gikan sa City Health Department.
Ang Cebu City adunay 1,765 Covid-19 positive diin kapin sa 90 porsiyento kanila walay mga sintomas.