Pagsagop sa digital

Sa positibong pagtan-aw sa coronavirus disease 2019 (Covid-19) pandemic, ang mga Filipino labi na sa mga Sugbuanon, ug ubang katawhan sa kalibotan napugos sa pagpangita og diskarte aron magpabiling produktibo o bisan kasandigan panahon sa kalaay sa lockdown.

Ug tungod sa Covid-19, mipaspas ang pagsagop sa publiko sa digital technology ug nahimong taytayan sa pagtakdo sa kibhang nga mitumaw tali sa naandan niadto batok sa kalit nga kausaban sa kahimtang karon.

Ang enhanced community quarantine (ECQ) ug ang pagdili sa biyahe naghimo sa internet ug digital applications nga komon nga gisaligan sa kasarangang Filipino. Mipataas sa pagsagop sa applications nga maghatag og kasayon bisan sa yanong lingaw sama sa pagluto o konektado kanunay sa mga higala nga naa sa layo.

Nauso ang work from home (WFH) sa halos tanang buhatan, pribado ug publiko. Ang skeletal force ug diskarte sa negosyo nasuwayan ning panahona. Mitaas usab ang demanda sa pag-order online ug delivery.

Sa usa ka artikulo sa Globe Telecom, nikutlo kini sa Digital 2020 April Statshot report sa Hootsuite ug We Are Social, dunay dakong pagtubo sa Pilipinas sa paggamit sa internet sa pag-apas sa sitwasyon.

Sumala sa survey, ang 64% sa Filipino internet users gikatahong mas migugol pa og taas nga panahon sa social media ug ang 23% sa users mas nipili sa pagpamalit sa online.

Matod sa mga batid sa panglawas, ang Covid-19 crisis molahutay pa pipila ka buwan o tuig, dili kutob lang sa gilugwayan nga tagal sa ECQ sa dakbayan sa Sugbo sa Mayo 31, 2020.

Moirog na kita. Ipatok og balik sa ekonomiya sa Sugbo. Dili magpaulipon sa kahadlok. Magpuyo kita uban sa hagit sa Covid-16 apan ubos sa bag-ong normal nga pagpakabuhi.