I hear your whisper

Unya miyangu-yango si Ramil. Mipadayon mig lakaw pahilayo sa reclamation area. “Di ta maghisgot ni Zenaida, Olga.” “Kinsa man diay ang angay natong hisgotan, Ramil?” Mipahilayog one meter away si Ramil nako.

“Wala, Olga. What I mean, di nato hisgotan ang hilom nga love ni Zenaida nako. Obvious man gyud tuod nga nakagusto siya nako. But I don’t like that kind of girl. Kana bang maoy

mangulitawo sa laki.” Naghilom ko.

“Ang gusto nako nga mahimong girlfriend kanang akong giantosan. Kana bang gipabalik-balik ko niyag pamisita una pa ko niya sugta.”

“Unya, kon duna nay daang pagmahal nimo ang girl, di gyud ka paantuson. Sugton gyud ka dayon niya, Ram?”

Gipanid-an ko ang reaksiyon ni Ramil. Normal lang ang ekspresyon nga nakita ko sa iyang nawong.

“Well, kon ang babaye nga akong pangulitawhan dunay pagbati nga parehas anang imong giingon, Olga, ako pang hunahunaon pag-ayo.”

Nag-smile si Ramil nga mitan-aw nako. Gikidhatan pa ko niya. Misamot siya kaguwapo sa akong tan-aw niya karon. Aw, everyday nga magkita mi, wa man koy nakita nga bati niya. Guwapo gyud siya sa tanang panahon.

Tua sa unahan ang balay nila ni Ramil. Wa dayon siya mopadayon, mihapit siyag kadiyot sa among balay. Apan diha ra siya sa among lagwerta. “Saka una, Ram.” “Ayaw na lang, Olga. Gabii na. Sige, goodnight na lang.” “Goodnight, too, Ramil.” Wa dayon ko mosulod sa among balay. Gisundan kog tan-aw si Ramil nga mibiya na sa among balay. Nakapanghupaw ko. Kanus-a pa kaha makita ni Ramil ang hilom kong paghigugma niya?

Anang gabhiona, tungod kay wa ko batiag katulugon, nakahunahuna ko sa pagpadalag message kang Ramil. Apan wa pa gani ko makatulpok sa mga letra sa touchscreen kong selpon, dihay nanuktok sa pultahan sa akong kuwarto, unya miguho ang ulo ni Mama.

“Naa si Zenaida sa atong sala, Olga. Duna kuno siyay tuyo nimo.”

Nahibulong ko sa kalit nga pag-abot ni Zenaida sa among balay karon.