NAGPANIKAD NA SI LEBRON APAN...
Gibutyag ni Los Angeles Lakers superstar LeBron James ang iyang kahinam nga mahibalik na ang aksyon sa National Basketball Association (NBA).
Apan giklaro sa four-time MVP nga kinahanglang maseguro una ang kaluwasan sa tanang mga magduduwa alang sa tagsatagsa ka pamilya niini.
Nahunong ang mga kombati sa NBA 2019-20 season niadtong Marso 11, 2020 gumikan sa pagkuyanap sa coronavirus disease 2019 (Covid-19).
Nanghinaot si James nga mahibalik ang mga duwa sa NBA sa labing dali nga panahon.
"Definitely not giving up on the season," matod ni James, kanang Lakers nag-una sa Western Conference dihang nahunong ang kombati sa liga.
Tanang mayorihiyang mga kompetisyon sa kalibutan naapektuhan ning panahon sa krisis sa kahimsog ug dili lang ang NBA, hinuon hinayhinay nang naglihok ang uban nga makabalik sa pagbahar og gamay sa hulga sa Covid-19.
Ang Bundesliga sa Germany maoy labing unang European football league nga nakabalik human sa duha ka mga buwan nga pagkahunong.
Ning bag-uhay lang, ang bantugang NASCAR stock car series sa North America nakabalik na sab apan wala'y mga tumatan-aw nga gitugtan.
Ang NBA hasta ang Major League Baseball, National Hockey League ug Major League Soccer padayon pang nahan-ay og mga plano alang sa ilang pagbalik.
"Not only myself and my teammates, the Lakers organization, we want to play," padayag ni James.
"There's a lot of players that I know personally that want to play. And obviously, we don't ever want to jeopardize the health of any of our players or any of the players' families and so on and so on." Gipasabot ni James nga grabe man tuod ang iyang kahinam nga mobalik og duwa apan kinahanglan nilang hangupon kon unsay maayong buhaton sa kasamtangang sitwasyon.
"This is a pandemic that we have no idea -- we can't control it," pasabot ni James.
"We're going to listen to the people that's been following this pandemic, following the numbers, following the data." Pagkahunong sa liga, ang Lakers maoy No. 2 overall sa standing sunod sa league-leader Milwaukee Bucks, gikahadlukang puwersa sa Eastern Conference. Gawas niini, nakaseguro na sab ang Lakers og luna sa playoffs hinungdan nga gianugnan og maayo si James nga nahunong ang liga. Adunay plano nga moderetso na lang sa playoffs inig balik sa aksyon sa liga. Posible sab nga wala'y mga tumatan-aw nga tugotang makasulod sa venue inig balik sa NBA. Dili man tuod uyon si James ning maong ideya apan wala ra gihapon siya'y mahimo kon dili sa pagduwa kon mao kini ang ipatuman sa liga.
"You know, I want to get back to playing," pagtino ni James.
"I love to play the game of basketball. I know how inspiring the game of basketball is. I know how inspiring sport is, itself."
Si NBA Commissioner Adam Silver nagkanayon nga mohuwat pa sila og pipila ka mga semana una mobuhi og pinal nga desisyon.