Kaso sa mga kurakot

Samtang daghan pang mga local government unit (LGU) ang wala makakompleto sa pagpanghatag sa Social Amelioration Program (SAP), ubay-ubay na usab sa mga barangay officials ang nag-atubang og kasong kriminal tungod sa anomaliya sa pagpang-apod-apod niini. Si Secretary Eduardo Año, sa Department of the Interior and Local Government (DILG), mibutyag nga sagad sa mga barangay officials nga gialegahang nakahimo og anomaliya naglakip sa mga barangay kapitan, barangay konsehal, mga tresurero, mga sekretarya, mga empleyado sa barangay, purok leaders ug bisan gani mga social workers.

Kini maoy isip tubag usab sa daghang mga reklamo ilabi na sa giingong dili makiangayon nga pagpili kon kinsa ang angay hatagan. Dunay mga kaliwat og suod nga bisan tuod og dili kwalipikado ang nadiskobrehan nga maoy gihatag sa benipisyo.

Sa dakbayan sa Lapu-Lapu, dunay kapitan nga gidudahan tungod kay daghang nakadawat nga susama niya og apelyido.

Mao usab kini ang usa sa ilang social workers kinsa gipaubos na usab karon sa imbestigasyon tungod kay gawas sa upat ka kaliwat, nalakip usab ang in-law niini ug ingon man ang uyab sa iyang anak isip SAP beneficiaries bisan og dili kuwalipikado.

Nahitabo usab kini sa Cebu City. Sa kalungsoran sa probinsiya sa Sugbo, nagbaha ang reklamo sa mga wala makadawat bisan pa man og anaa ang ilang pangalan sa listahan.

Laing kaso sa anomaliya nga nagtribukar mao ang pagkapon sa mga hinabang.

Usa sa mga rason kon nganong dali ra makahimo og binuang kining mga kurakot nga mga barangay officials mao ang walay klarong guidelines nga gihikyad aron maoy sundon sa pagpanghatag og hinabang.

Hinaot matutokan ni sa kadagkuan kay hapit na ra ba usab ang ikaduhang pagpanghatag sa SAP.