Kurakot sa SAP

Gitinuod gyud sa Department of the Interior and Local Government (DILG) ang pag-imbestigar niadtong mga barangay officials ug mga social workers nga nangurakot, mihatag og pabor ug namulitika sa Social Amelioration Program (SAP) subsidy niadtong nakalabay’ng semana.

Aduna pay laing hugna sa SAP nga ipanghatag ang kagamhanan niadtong mga lugar nga ubos gihapon sa enhanced community quarantine (ECQ). Aw, qualified gihapon ang taga Cebu og Mandaue City kay ubos man gihapon kita sa ECQ. Apan ang pangutana kon kanus-a?

Hinuon misaad man si Presidente Duterte nga aduna pay laing five million ang posibleng mahatagan sa sunod hugna nga tag P8 mil gihapon didto sa Kauluhan ug P6 mil dinhi sa rehiyon. Gi-imbestigahan karon sa DILG pinaagi sa PNP Criminal Investigation and Detection Group (CIDG) ang mga posibleng nakahimo og kalapasan sa pagpanghatag sa SAP.

Mga barangay officials ug mga social workers ni sila. Klaro man gud nga adunay korapsiyon, pabor-pabor ug pamulitika ang pagpanghatag. Kurapsiyon gumikan kay adunay ubang mga barangay officials nga nangayo og cut o bahin sa nadawat sa mga beneficiaries.

Adunay ubang mga opisyal nga nangayo og P2,000 o katunga sa nadawat sa mga beneficiaries. Pabor-pabor gumikan kay ang mga opisyal sa barangay o ang mga social workers, ilang giuna sa listahan ang ilang mga kabanay ug partenye.

Sama niadtong nahitabo ni Mrs. Maria Leonor Feliciano sa Lapu-Lapu City nga ang iyang inahan, igsuon, bayaw ug uyab sa iyang anak giapil sa lista. Gipamulitika gumikan kay ang ubang mga barangay officials ilang gi-una ang ilang mga supporters. Samtang ang mga kontra partido, gilabyan lang. Unya aduna pay mga arang-arang og kahimtang ang nakadawat.

Tiaw ba nimo kanang ang uban panahon sa pagkobra, nagsakay og luhong mga awto. Naay sakyanan, unya

‘poorest of the poor' diay na? Dakong binoang ba. Aw, mao nang maayo gyud ning tinudon gyud ba para motagam.