Salamat, Tiukinhoy: Cebra

Gipadayag sa mga basketball referees sa Cebu Schools Athletic Foundation Inc. (Cesafi) ang ilang dakong pasalamat ngadto kang Commissioner Felix Tiukinhoy Jr. sa paghimo niini og lakang aron makadawat sila og ayuda ning panahon sa krisis sa kahimsog.

Mao kini ang gibutyag sa beteranong basketball referee sa Sugbo nga si Edwin Dejacto, kinsa sakop sa board sa Cebu Basketball Referees Association (Cebra).

Pinaagi sa inisyatiba ni Tiukinhoy, nagkausa ang Cesafi board nga mohatag og hinabang sa tanang 495 ka mga tawo nga nahilambigit sa pagpadagan sa mga kompetisyon sa Cesafi lakip na ang mga referee.

"Kami tanang members sa Cebra pinangulohan sa among presidente nga si Ed Aguelo nagpasalamat og dako kang sir Tiukinhoy ug sa Cesafi board sa ilang pagtabang namo," matod ni Dejacto.

Ang pagpanghatag og hinabang gikan sa Cesafi ipahigayon sugod karong adlawa sa Cebu Coliseum.

Nakadesisyon si Tiukinhoy nga mohatag og ayuda sa ilang mga tawo gumikan sa pagkanselar sa 2020 Cesafi season tungod sa hulga sa coronavirus disease 2019 (Covid-19).

Gawas sa mga referee, makadawat sab og ayuda ang coaches, utility personnels, nurses, security guards, janitors, ug ticket personnels sa Cesafi.

Ang matag personalidad nga tabangan makadawat og food basket nga gilangkuban og 10 ka kilo nga bugas, canned goods ug spaghetti pack gikan sa Virginia Food Inc.

"Dako na kaayo ni og tabang para namo hilabi na kay na-extend sa ECQ (enhanced community quarantine) hangtod karong Mayo 31," dugang ni Dejacto.

Kadaghanan sa mga sakop sa Cebra nawad-an og pangita sa kinabuhi gumikan sa kanselasyon sa Cesafi.

Kuli man tuod nga mahitabo apan giklaro ni Dejacto nga padayon silang nag-ampo ug nanghinaot nga mausab ang desisyon sa Cesafi ug madayon ang 2020 season.

"Nag-ampo lagi mi nga mausab ang desisyon sa Cesafi kay naa pa may panahon," batbat ni Dejacto.

"Hinuon kasabot man mi sa desisyon sa Cesafi para man ni sa safety sa tanan. Maayo unta'g mawala na ni ang coronavirus."

Ang Cesafi basketball nakatakda untang sugdan sa ulahing bahin karong Agusto, 2020 unya mosunod ang ubang sporting events.