MGA NIGUKOD NI PACMAN GIPIKHAN NI MAYWEATHER

Gipangsaway sa retiradong si Floyd Mayweather Jr. ang batan-ong mga boksidor nga nagtinguhang makig-away kang World Boxing Association (WBA) welterweight champion Manny Pacquiao.

Alang kang Mayweather, wala na'y arang sa batan-ong mga boksidor nga maggukod pa kang Pacquiao gumikan kay nag-edad na og 41 ang Pambansang Kamao ng Pilipinas.

“It’s sad that you hear guys say, ‘I want to fight Manny Pacquiao,” matod ni Mayweather sa interbyu sa Fighthype.com.

“But Manny Pacquiao is 41 now. Don’t chase him."

Gitambagan ni Mayweather ang batan-ong mga boksidor nga imbes magtinguha og away batok kang Pacquiao, mas maayong mag-unay kini.

"You young guys chase each other. Stop chasing this old man. If the opportunity presents itself, go out and do what you got to do. Let Manny Pacquiao pick and choose who he wants to fight. With everything he’s accomplished, hopefully, he’s made some smart investments,” tambag ni Mayweather.

Lakip sa batan-ong mga boksidor nga nangambisyon makig-away kang Pacquiao mao sila si World Boxing Organization (WBO) welterweight champion Terrence Crawford, 32, International Boxing Federation (IBF) ug World Boxing Council (WBC) welterweight king Errol Spence Jr., 30, ug Mikey Garcia, 32.

Hasta ang 21 anyos nga si Ryan Garcia nangandoy sab nga makig-away sa bugtong 8-division world champion.

Si Mayweather, 43, kinsa milupig ni Pacquiao pinaagi sa unanimous decision niadtong 2015, miretiro niadtong 2017.

Hangtod karon, ang fighting senator sa Pilipinas aktibo pa.

Taliwala sa iyang pangidaron, napamatud-an ni Pacquiao nga kaya gihapon niyang modaog batok sa batan-on ug dekalidad nga mga boksidor.

Iya kining napamatud-an pinaagi sa paglupig nila ni Adrien Broner ug Keith Thurman.

Ning puntoha, wala pa'y plano si Pacquiao nga miretiro.

Plano unta ni Pacquiao nga moaway karong Hulyo, 2020 apan seguradong mauswag kini gumikan sa padayong hulga sa coronavirus disease 2019 (Covid-19).

Matod ni Mayweather nga dili siya manumbaling kon padayon pang moaway si Pacquiao.

“It’s his prerogative to do what he wants to do. I don’t have anything against him, but it’s not me, ” pasabot ni Mayweather.