JORDAN NAMAKAK SA ‘LAST DANCE’: GRANT

Gipikhan sa kanhi sakop sa Chicago Bulls nga si Horace Grant kagahapon (RP time) si basketball legend Michael Jordan kabahin sa malampusong television documentary series nga giulohan og “The Last Dance.”

Gipasanginlan ni Grant si Jordan nga naghatag og gituis nga kamaturoan ngadto sa dokumentaryo.

Sa interbyu sa ESPN, si Grant, kinsa midaog og tulo ka mga titulo sa National Basketball Association (NBA) kauban si Jordan, miingon nga gi-edit ang dokumentaryo aron mahimong pabor kang Jordan.

“I would say it was entertaining, but we know, who was there as teammates, that about 90% of it was BS in terms of the realness of it,” matod ni Grant.

“It wasn’t real – because a lot of things (Jordan) said to some of his teammates, that his teammates went back at him.”

Matod ni Grant nga kon dokumentaryo, angayan nga kamaturoan ang ipagawas niini.

Gisaway sab ni Grant ang kinaiya ni Jordan, kinsa iyang giakusahan nga kusog mangasaba ug manapat sa ilang kaubang mga magduduwa sa locker room.

Usa ka segment sa “The Last Dance,” nagpakita sa panaglalis ug panagsukmagay nila ni Jordan ug kanhi pambatong pointguard sa Bulls nga si Steve Kerr atol sa praktis sa 6-time NBA champions.

Giklaro ni Grant nga sukad masukad, wala siya magpadominar kang Jordan ug iya kining suklan sa higayon nga mangasaba kini kaniya.

“(Jordan) felt that he could dominate me, but that was sadly mistaken,” asoy ni Grant.

“Because whenever he went at me, I went at him right back.

But in terms of Will Perdue, Steve Kerr and the young man, Scott Burrell, that was heartbreaking. To see a guy, a leader, to go at those guys like that.”

Gitataw ni Grant nga nakasabot siya nga kinahanglang maninguha ang tanan sa ensayo apan dili kini paabton sa punto nga sukmagon o dapatan ang kaubang magduduwa.

/ BLEACHERREPORT.COM, TV5.ESPN.COM ■ JORDAN, GRANT: Si Michael Jordan (wala) nga daw og sa dunay gitambag sa batan-on nga si Horace Grant niining aktoha atol sa ilang panahon sa Chicago Bulls, samtang makita sa gamayng hulagway ang tagsatagsa nila ka interbyu sa dokumentaryo sa kaagi ni Jordan nga “The Last Dance.”