Hain ang mas kahadlukan?

Grabe ang epekto sa coronavirus disease 2019 (Covid-19) di lang kay daghan ang nangasakit, kon di ang dakung kadaut o perdisyon sa ekonomiya dinhi sa nasod ug ubang mga dapit sa kalibutan. Bisan ang adunahang mga nasod, sama sa United States of America, naigo. Sa USA, minilyon ka mga trabaho ang nangawala.

Dinhi sa Pilipinas, minilyon usab ka mga trabahante ang apektado tungod sa pagpanira sa mga kompaniya. Ang wa kaayo maapektuhi mao kadtong nagbaligya og mga pagkaon, medical supplies ug uban pang nag-unang mga panginahanglan sa tawo.

Di lang kay ang mga negusyante ang naigo og maayo, apil na usab ang kagamhanan nga nibubo og binilyong pundo aron ikasuporta sa kinabag-an sa sector nga naigo og maayo sa pagkawala sa ilang panginabuhian.

Gibana-bana gani nga pudyot lang sa porsyento ang pagtubo sa ekonomiya sa nasod. Sa ato pa, guba kaayo ang ekonomiya.

Naninguha karon ang kagamhanan nga makakita og paagi nga anam nang mabalik ang mga patigayon hinungdan nga gilugakan ang kadaghanan sa mga dapit sa nasod pinaagi sa pagpailawom ngadto sa general community quarantine (GCQ).

Di magic ang pagpabangon sa ekonomiya samtang naa pa ang hulga sa Covid. Kon naa ang “new normal,” kini nagkahulogan nga limitado ang tanan, bisan gani ang naandang lihok ug buhat.

Makaapabot ba ang publiko nga momaayo ang dagan sa ekonomiya ug mahibalik ang tanan sa normal karong tuiga? Kuli pa kining mahitabo basta naa pa ang hulga sa Covid.

Apan gikinahanglan bang mahadlok ang katawhan sa virus nga hangtod moabot sa punto nga maparalisar ang tanan, bisan ang ekonomiya? Mas angay tingali kahadlukan ang pagkahagsa sa ekonomiya kay sa kagaw. Tingali, pil-on og 100 ang gidaghanon sa mangamatay sa laing mga sakit ug malunosan sa gutom tungod sa paghagsa sa ekonomiya kay sa mangamatay sa mao nga sakit. Ang gidaghanon sa namatay sa Sugbo maoy buhing ehemplo.