LTFRB 7: SPECIAL PERMIT SA PUJ ARON MAKAPASADA ATOL SA GCQ
Nipahimangno ang Land Transportation Franchising and Regulatory Board (LTFRB) 7 ngadto sa mga operator og public utility jeepney (PUJ) sa dakbayan sa Lapu-Lapu ug lalawigan sa Sugbo nga di mahimong mobiyahe karon bisan ubos na sa general community cuarantine (GCQ).
Kini human nakadawat og taho ang LTFRB 7 nga adunay PUJs nga nanagan sa kadalanan sa Lapu-Lapu nga ubos na sa GCQ.
Matod ni LTFRB 7 Regional Director Eduardo Montealto Jr., nga di makadagan ang pampubliko nga sakyanan kon way special permit gikan sa ilang buhatan bisan dunay prangkisa. Usa kini sa guidelines sa Department of Transportation (DOTr) atol sa pagpatuman sa GCQ.
Kalapasan sa "... terms and conditions of Franchise" ang pagdagan sa usa ka pampubliko nga sakyanan nga walay special permit.
Mamahimo kining makamulta og P5,000 sa unang kalapasan; P10,000 sa ikaduha, ug P15,000 sa ikatulo, diin mamahimo nga mabawian kini sa prangkisa.
Dugang ni Montealto nga duha ka teams inabagan sa Highway Patrol Group (HPG) ang gipakatap nila sa kadalanan sa Lapu-Lapu ug lalawigan.
Kini aron masiguro nga ang nanagan nga mga pampubliko nga sakyanan kato rang gitugutan. Sa pagkakaron anaa pa lang sa 12 ka bus nga nanagan sa Lapu-Lapu. Apan gibutyag ni Montealto nga 36 na ka special permits ang naisyu nila sa maong dakbayan, upat niini ang modern jeep samtang bus nga kasagaran.
Samtang sa lalawigan, anaa palang sa 78 ka bus ang nanagan sa norte ug 73 sa habagatan.
Dugang ni Montealto nga nihit pa ang mga pasahero hinungdan nga wa pa nila hingpit napadagan ang 111 ka bus alang sa norte ug 200 sa habagatan.
Andam na ang maong mga bus ug naisyuhan na kini og special permits.
Anaa ra kutob sa Sta. Lucia sa Consolacion ug sa Lantaw sa Talisay kutob ang mga bus. Nisubay usab kini sa guidelines sa DOTr aron masiguro nga napatuman ang lakang batok Covid-19.
Gikan sa 40 ka pasahero, anaa ra sa 20 ang mamahimong masakay sa non-aircon bus subay sa social distancing nga gipatuman.