Lagda sa simbahan sa KBL
Kadtong mga minyuonon, labi pa kadtong kaslon karong Hunyo, kon nagplano mo o nangambisyon og engrande nga seremonyas, kalimti na. Kini gumikan kay ang Catholic Bishops Conference of the Philippines (CBCP) mipagawas na og polisiya kon mobukas na ang simbahan karong Hunyo. Tipik ug kabahin kini sa new normal nga gisagop sa Simbahang Katoliko aron kalikayan ang pagkatap sa virus kabahin sa KBL (kasal, bunyag ug lubong).
Dili lang sa kasal kon dili apil na usab sa bunyag ug lubong sa patay. Daghan ang kausaban karon sa simbahan. Sa lubong, wala nay kita ang mga simbahan ug sementeryo labi pa ang mga sepulturero kay wala naman kaayoy ilubong. Halos tanang mga mamatay karon, suspected
Covid man ug ipa-cremate sa Department of Health (DOH). Wala nay seremonyas, bilar o lamay. Limitahan na ang mokuyog ug wala nay limus.
Ang lagda sa simbahan kabahin sa kasal: wala nay entourage. So, wala na ang parada o paso sa mga minor ug major sponsors. Wa nay mga bata isip ring ug Bible bearer ug flower girl. Ang nga ninong ug ninang limitado na lang sa duha ug ang mga ginikanan sa babaye ug lalake. Unya ang guests limitado na lang sa napulo.
Unya sa reception, bawal ang tapok-tapok, so gamay na lang ang mga bisita ug gamay na lang ang pakan-on. Dili na engrande. Apektado niini ang wedding planners, videographer, photographers ug ang mga reception venue. Patay’ng negosyo. Mao sab gihapon sa mga magpabunyag, limitado ang maninoy ug maninay. Kaniadto puwerting taasa sa listahan sa mga mangugos.
Lain lagda sa simbahan mao nga mo-observe gihapon og social distancing ang mga manimbahay. Lagyo ang distansiya. Dili na mo-amen o mohalok sa mga kamot sa pari. Wala nay holy water ibutang sa pultahan sa simbahan. Dili na mohikap sa santos ug dayon panguros. Wala nay pagpangumpisal nga mag-atubangay sa pari. Dili na ihungit ang ostiyas o deretso sa baba sa nangalawat gikan sa mga kamot sa pari kay basin wala manghunaw. Dawaton na lang sa mokalawat ug siya nay mobutang sa iyang baba. Alang sa mga molimos, kuhaa lang ang pangalan sa pari, celfon number ug i-pera padala na lang.