Balaudnon ni Pia
Duna karoy balaudnon sa Senado nga giduso ni Senador Pia Cayetano. Ang Senate Bill 1518 kun Safe Pathways Act nagduso sa paglakaw, biseklita ug uban pang non-motorized nga sakyanan isip bag-ong paagi sa transportasyon panahon ning coronavirus disease pandemic.
Kon mapasar, pamutangan ang mga karsada og pop up bike lanes. Kinahanglan nga exclusive ra kini nga lane sa mga biseklita. Maanindot ang balaudnon ni Cayetano kon tan-awon ang papel. Maanindot usab kini isip unang lakang aron matuman ang gidamgo sa mga biker nga sama nako, ang tinud-anay nga bike lanes nga alang lang sa magbiseklita.
Ang bike lane, matod ni Cayetano, haum karong panahuna sa pandemic. Tinuod haum, but mas maayo unta kon nasayo pa kini.
Matuman man kini sa ubang mga dapit sa nasod, apan ambot kon applicable ba kini dinhi sa Sugbo. Naghuot na man gani sa mga sakyanan ang mga karsadang hagip-ot, unsa na kaha kon butangan pa og bike lanes? Basin sa mga dapit sama sa Metro Manila, Davao ug uban pang lapad og mga karsada, applicable ang mao nga proyekto.
Mahimo usab kini karon panahon sa pandemic kay di huot ang karsada sa mga sakyanan, labina panahon sa kagabhion.
Daghan intawong mga nurse ug uban pa nga maglakaw sa karsada.
BISEKLITA
Kaniadto nagsuwat ko kabahin sa kamahinungdanon sa biseklita nga kinahanglan ang matag balay naay labing minos usa. Karon panahon sa pandemic, namatud-an kon unsa diay kamahinungdanon kining two-wheeled, non-motorized, foot-powered nga sakyanan. It is easy to move around kon duna kay biseklita.
Lisod ang pagsakay kay way gitugtang makabiyahe nga habalhabal. Wa say gitugtang makaangkas. Busa, ang biseklita maayong alternatibo.
Kon duna kay folding bike o
BMX, mahimo ra kining tauran og butanganan sa kinompra, basta di lang bug-at kaayo.
LUWAS
Kon tigbiyahe ka sa gabii, mas maayo nga magtaud ka og blinker sa likod sa imong biseklita, labina ilawom sa seatpost o ubos sa lingkuranan. Kanang visible bisan sa layo.
Di angay mokompyansa kay mas kuyaw karon ibiyahe tungod sa kagamay sa mga sakyanan ug magpaturagas lang pagpadagan ang mga driver. Seguradoha usab ang pagsulob og helmet ug sapot nga di dark. Sa ingon makita ka sa karsada bisan di kaayo hayag.
Hinumdomi, sa biseklita, safety first.