No vaccine, no classes

Kon ang taga Department of Education (DepEd) ang pabuton mobukas ang klase sa mga public schools karong Agusto 24. Ambot kon unsa ang ilang gibasihan niini? Sigurado ba sila nga nianang maong petsa, mohinay na o mawala na kaha ang gikalisangan nga coronavirus disease (Covid-19)?

Bisan og mosagop na kita sa new normal ug wala na ang deklarasyon sa general community quarantine (GCQ) dili kita makasiguro nga wala na ang Covid-19. Tinuod, importante kaayo ang edukasyon labi pa sa mga kabataan.

Apan mag-unsa man ang edukasyon kon namiligro ang kinabuhi sa mga kabataan. Adunay sugyot karon ang pipila ka mga kongresista nga dili gyud buksan ang klase kon walay madiskobre nga vaccine o tambal alang sa Covid-19. Dili sila gusto nga mabutang sa peligro ang mga kinabuhi sa mga estudyante.

Si kinsa man unya ang manubag kon simbako adunay matakbuyan labi pa gyud kon mamatay ang tinun-an?

Apan ang pangutana kon kanus-a kaha madiskobre ang vaccine? Nagpadayon pa ang mga scientists sa nagkalain-laing nasud pag-research niini. Ang ubang mga nasud dili usab mobukas sa ilang mga klase kon walay madiskobre nga bakuna.

Aduna usay laing mga sugyot nga sa Enero 2021 na buksan ang klase aron masiguro gyud nga mawagtang na ang gikahadlukan nga Covid-19. Hangtod nga adunay tambal nga madiskobre batok niini, dili na gyud kita makabalik sa unsa man ang naandan.

Dili na ta makahilok-hilok kon unsa man ang atong gusto sama niadtong wala pa ang Covid.

Kon mograbe ang sitwasyon, wala nay eskuwelahan nga tambungan ang mga tinun-an. Wala nay physical lecture uban sa mga magtutudlo. Mapadayon gihapon ang edukasyon apan pinaagi na lang sa online o non-physical contact lecture tali sa mga estudyante og mga maestro. Pero ang problema aduna bay access sa internet ang tanan labi pa ngadto sa kabaryohan? Makapalit ba og gadget sama sa cellular phone ug computer labi pa ang mga kabus? Unahon una sa kagamhanan kini sa dili pa sila mo-introduce og bag-ong sistema sa edukasyon.