Imbestigahon sa OSCA

Hinam. Daghan na ang naghinamhinam nga maubos na sa modified general community quarantine (MECQ) o di ba general community quarantine (GCQ) ang dakbayan sa Mandaue ug Cebu City tungod kay motapos sa Mayo 31 ang enhanced community quarantine (ECQ) ning duha ka siyudad.

Apan morag tidlum pa ang tsansa sa Cebu City nga maubos sa MECQ tungod kay daghan pa ang positibo sa Covid-19.

Kini aduna nay 1,869 ka mga tawo ang positibo samtang sa 223 ang sa Mandaue. Ig-abot sa Hunyo 1, dako ang purohan sa Mandaue nga maubos sa MECQ o GCQ, sama sa LapuLapu, tungod kay gamay ra ang mga nataptan.

Sa Cebu City, manghinaut ta nga mohunong na ang pagsaka sa napositibo aron monaug ta sa MECQ o GCQ ug makalihok na ang atong ekonomiya. Mayo 22, 2020, ang Inter-Agency Task Force (IATF) nagpakanaug og resolution 38 nga nag-amendar sa kabahin sa kwarentinas.

Sa nag-una nga resolusyon, ang mga senior citizen, nga dunay quarantine pass, makagawas na sa ilang panimalay aron mopalit sa iyang panginahanglanon personal ug sa panimalay.

Makadaghan na ko mogawas sa balay aron mopalit sa akong tambal ug bitamina. Akong i-asoy dinhi ang wala pagpasulod kanako sa Robinson’s Supermarket sa Talamban niadtong Mayo 23 tungod sa akong edad. Gibasahan ko sa gwardya nga wala mag-uniporme sa executive order (EO) ni Cebu City Mayor Edgar Labella nga di pasudlon ang senior citizen.

Bisan sa akong pag-insister dunay exemption basta mopalit og pagkaon o tambal ang gwardiya di gyud mosugot. Gani, akong usab siya gisultihan nga sakop ko sa prensa apan iya lang gibaliwa kay lagi nahadlok siya sa EO. Ako siya gisultian nga sa miaging Sabado, namalit ko og pagkaon nga wa ko magdala sa pass apan gipasulod ko sa gwardiya nga nag-uniporme. Di gihapon mosugot.

Gikomedyahan ko sa akong mga higala nga wa ko gipasulod tungod sa discount. Sa wa makaila nako, lig-on pa tawon ko ug kusog pa ko molakaw ug dagan bisan og di ko sakop sa “Walk and Talk”, ang pundok ni Torni Frank. Mao ni ang probisyon sa IATF Resolution "except when indispensable under the circumstances for obtaining essential goods, services, or work in establishments located therein", nga nagtugot sa mga senior citizen nga makagawas sa ilang balay og makasulod sa tindahan o supermarket.

Wa pa ko gitubag sa Robinson’s management sa akong reklamo nga akong gi-email. Mohangyo ko sa Office of the Senior Citizen Affairs (OSCA) ug Commission on Human Rights (CHR) nga imbestigahan ang Robinson’s sa ilang paglapas sa katungod sa mga senior citizen.