Kwarta na lang unta

Mas makatabang unta sa lokal nga ekonomiya kon kwarta na lang ang gipanghatag sa mga LGU imbes mga bugas ug linata. Ngano? Kay ang matag pamilya duna untay magamit sa pagpamalit sa ilang gikinahanglan.

Makapabuhi kini sa mercado. Ang mga kabus duna na untay magamit alang sa pagpamalit og bugas ug para sud-an, apil pa ang mga lamas, sabon, shampoo, ug ubang mga gikinahanglan. Kay bugas man ang gipanghatag, ang nakakwarta mao ra ang rice dealer nga gipalitan sa LGU ug ang mga maayong laki nga nagbahin sa giingong “for the boys.”

Aw, sayop diay kuno na, matod pa sa among silingan.

Imbes for the boys diay, ang nahitabo karon kay “for the boss.” Dayon, imbes sinako ang ipanghatag aron kausa lang, tunga-tunga-on pa gyud aron kunohay maapod sa kadaghanan. Nakaingon ko nga kunohay kay gibahinbahin kini aron dunay daghang mabilin sa nagbahin. Hahaha.

MGA PETISYON

Nakapirma na mo sa online petition nga buhion sa kagamhanan pagbalik ang ABSCBN? Sulod lang sa duha ka adlaw, nahimo nang 1.2 milyones ang namirma. Kada household sa tibuok nasud kay duna may labing gamay usa ka smartphone.

Nagtuo ko nga dali kaayong modaghan pa ngadto sa pipila ka milyon ang maong petisyon. Maglisod sa pag-apas niini ang petisyon signing nga gihikay karon sa Department of Interior and Local Governments (DILG) alang sa charter change.

Target sa DILG nga moabot og dos milyones ang kadaghanon sa mga pirma sa ilang petisyon. Ilang ma-mobilize ang lain-laing mga LGU sa tibuok nasud. Bahala na sa kadako unya sa magasto sa kagamhanan ug sa mga politiko.

Aw mokuot man sa bulsa ang mga politiko nga gustong magpabilib nga mas daghan silag nakuhang mga pirma. Apan klarong di kini makaapas sa kadaghan unya sa mopirma sa petisyon alang sa paghatag og franchise pagbalik sa ABS-CBN.

Moguwa na unya nga bastos nga suportahan sa Kongreso ang petisyon sa DILG apan padayon nilang ipadaplin ang petisyon nga paablihan pagbalik ang ABS-CBN. Taliwala sa pandemic, bastos na gyud alang sa pipila nga nagpasiugda sa petisyon sa DILG ug ang nagpasirado sa ABS-CBN.

Apan nagtuo man gyud kining mga tawhana nga sama sa dagko kaayog bahakhak inig binastos ni Presidente Duterte, igo lang mokatawa ang katawhan karon. Wa lang nila makwenta karon nga lisod na mokatawa kon wala kay kan-on ug sudan sa lamesa. Diha unta sa pagbatok sa Covid-19 ug ang kagutom ang atong tutukan. Apan unsaon nga duna man gyuy bastos nga moinsulto kanato.