For you, no more

Sa paminaw ko sa akog kaugalingon, mikurog ko sa kalagot tungod ni Rodney. Ang animal nakahimo pa uroy sa pagtawag nako sa selpon. Duna pa uroy nawong nga makig-estorya nako ang kanahan.

Nakatilaw na nuon siya sa akong kasuko. Gikasab-an ko siya pag-ayo.

“Di na ko gusto nga motawag ka pa nako, Rodney! Ayaw na gyud ko samoka, ha? Wa na kay bili nako! Duna pa gihapoy laki nga tinud-anay

nga mahigugma nako. But for you, no more na gyud!”

Wa ko na huwata nga motubag pa si Rodney, gipawong ko ang akong selpon. Miginhawa kog sagunson kay morag mihuot ang akong dughan tungod sa kalagot ko kang Rodney. Unsa pa may iyang tuyo nako? Makigbalik siya nako? Huh! No way! Di ko sa lalaki nga way baroganan.

Unya nakunot ang akong agtang. Nahibulong ko kon nganong nakahibawo si Rodney

sa bag-o kong number sa akong selpon. Kalit kong nahunahuna si Rose. Wa nay lain, si Rose ang naghatag kang Rodney sa akong new number. Nakahibawo man si Rose ani. Igo na lang kong nagpanglingo. Close friend ni Rose si Rodney.

Giteksan ko si Rose aron pagklaro sa akong pagtuo.

“Sori, Mercy. Nangayo man gud siya sa bag-o nimong number. Wa ko kabalibad niya, gitagaan ko siya.”

Wa ko na replayi si Rose.

Ang importante nga nakahibawo ko nga siya gyud ang naghatag kang Rodney sa new number nako.

Unya mitawag ang akong cousin nga nagpuyo sa Mandaue. Nakaila siya kang Rodney kay kausa ana nga nanuroy mi si Rodney sa siyudad, gikasugat namo si Nymfa nga akong cousin. Gipaila-ila ko sila si Nymfa ug Rodney sa usag usa.

“Komusta na ka diha sa inyo, Mercy?”

“Nia, medyo nakaginhawa nag luag kay General Community Quarentine na man ang among lungsod. Ikaw diha sa Mandaue, komusta man sab?”

“Aw mao gihapon. Morag di kaginhawa kay dugay nang napreso sa balay. You know na bitaw nga ubos gihapon sa Enhanced Community Quarentine ang Mandaue.”

Unya gihisgotan na sab ni Nymfa kanako si Rodney. Hilom na sab kong naglagot.

(SUMPAYAN)