19 KA TAWO NAGTIGBAKAY, NADAKPAN
Upat ka mga tawo nasikop sa mga sakop sa Labangon Police Station nga nagtigbakay alas 4:30 sa hapon sa Dominggo, Mayo 24, 2020 sa sityo Proper, Barangay Buhisan, Dakbayan sa Sugbo.
Ang mga nangadakpan giilang sila si Felix Caballero Gingoyon, 58, taga sitio Taytayan, Buhisan; Jandy Lavandero Hernandez, 44, taga Buhisan Proper; Dan Hill Boligao Marquez, 27, taga sitio Puso; ug Jonathan Benliran Gabiana, 45, taga sitio Camparbille.
Nakuha gikan kanila ang duha ka mga sunoy nga bihag, lakip na ang kwarta nga pusta nga mobalor og P800.
Nakadawat og tawag sa telepono ang Labangon Police Station labot sa nagpatigbakay sa Barangay Buhisan.
Dali nila kining girespondedihan uban ang Regional Special Operations Group 7.
Sa dihang duol na ang mga pulis, nakabantay ang pipila ka mga tawo, naalibwag kini sa pagpanagan, apan ang upat ilang naabtan ug nadakpan.
Kalapasan sa Presidential Decree 1602 kun illegal cockfighting ug sa Section 9 paragraph (d) sa Republic Act 11332 kun Mandatory Reporting of Notifiable Diseases and Health Events of Public Health Concern Act taliwa sa pagpatuman sa enhanced community quarantine (ECQ) tungod sa hulga sa coronavirus disease 2019 (Covid-19).
3 KA GABII
Nakatug og tulo ka mga gabii ang 15 ka mga tawo nga nasikop sa Lapu-Lapu City Police Office (LCPO) tungod sa ilang pagpahigayon og tigbakay sa Sitio Tungdon, Brgy. Basak, Dakbayan sa Lapu-Lapu niadtong Sabado Mayo 23.
Ang mga nadakpan mao sila si Edwin Vistal, Jovencio Miano, Ramon Aroc, Reynaldo Morales, Christian Orat, Dante Elesorio, Jeambo Tumulak, Robert Cañete, Welkent Pucdol,
Frances Barolan, Charlou Dignos, Michael Inso, Joshua Cañete, David Densing ug Emmanuel Benlot, pulos taga Sitio Tungdon. Brgy Basak.
Matod ni Lapu-Lapu City Police Office (LCPO) Director Police Colonel Clarito Baja, usa ka concerned citizen ang nisumbong sa kapulisan kalabot sa tigbakay.
Dali kini nilang giadto nga miresulta sa pagkasikop sa mga dinakpan.
Apan aduna gihapoy nakasibat, sumala pa ni Baja.
Nakuha sa posisyon sa mga dinakpan ang duha ka mga manok igtatari, duha ka mga buwang ug salapi nga moabot og dul-an P900 nga maoy pusta sa mga nasikop. Gikatakdang mag-atubang ang mga dinakpan og kasong kalapasan sa Presidential Decree PD 1602 kun illegal cockfighting.
Pagpasabot ni Baja nga bisan kon general community quarantine (GCQ) na ang Dakbayan sa Lapu-Lapu, hugot gihapon nga gidili ang pagpahigayon og tigbakay sa dakbayan.
Gani bisag wala pay community quarantine, di gihapon kini mahimong tugotan gawas sa cockpit arena kun buwangan, hilabi na kon way permit.
Gikatakdang mag-atubang ang mga dinakpan ug moabot sa P30,000 nga bail bond gumikan sa bag-ong kamandoan sa korte sa dakbayan kalabot sa tigbakay.
Pahimangno ni Baja sa mga magpahigayon og tigbakay nga di sila makalusot sa kapulisan sanglit daghan na ang motaho kanila kalabot niini.
"Mga two weeks ago, nawala wala na ni pero karon nibalik wala pa nato masuta unsay rason ngano nagpahigayon gyud sila ani posible ganahan ra gyud sila," matod ni Baja.