5,000 KA MANOK ALANG SA CESAFI
Mohatag ang Bounty Agro Ventures Inc. (Bavi) og 5,000 ka Bounty Fresh dressed chicken alang sa mga tawo nga naglihok sa Cebu Schools Athletic Foundation Inc. (Cesafi) ning panahon sa krisis sa kahimsog.
Si Bavi president Ronald Mascariñas nagkanayon nga nakadayeg siya sa lakang sa Cesafi sa pagkanselar sa 2020 season niini alang sa kaluwasan sa mga atleta ug ubang nahilambigit sa kompetisyon nunot ning pagkuyanap sa coronavirus disease 2019 (Covid-19).
“We admire the efforts of Cesafi management in looking after the welfare of athletes and officials during this most difficult time. They are truly an inspiration,” mensahe ni Mascariñas nga gipadangat sa local sports media.
Matod ni Cesafi Commissioner Felix Tiukinhoy Jr. nga nasurpresa siya sa donasyon sa Bavi ug nagpasalamat siya'g dako niini.
Ang Bavi maoy tag-iya sa Chooks-To-Go Chicken.
“The Cesafi is truly grateful and blessed at this pleasant surprise from Mr. Ronald Mascariñas, President of BAVI. Cesafi officials, coaches, referees, ballboys, janitors and other support and utility of the teams are thankful for his generosity,” pamahayag ni Tiukinhoy.
Moabot ngadto sa 500 ka mga personalidad ang makabenepisyo sa donasyon sa Bavi.
Ang matag usa makadawat og tag 10 ka mga manok.
Plano ni Tiukinhoy nga matag semana, tag duha ang iyang ipanghatag nga mga manok ngadto sa mga benepisaryo.
Nagpasabot nga molanat og lima ka mga semana ang pagpanghatag sa mga manok. Si Tiukinhoy kasamtangang nakigsabot-sabot kang Bavi area sales manager Alward Espina alang sa pag-apod-apod sa mga manok.
Dili pa lang dugay, ang Cesafi nanghatag sab og food packs ngadto sa mga hingtungdan. /