For you, no more

(Ikaupat sa pito ka mga gula)

Ambot ba sab ning akong cousin nga morag nagsulug-sulog man nako. Gitawgan lang gyud ko niya aron mahibaw-an niya ang sitwasyon namo ni Rodney.

“You know, Gaw, bisan mag-unsa pag luhud-luhod si Rodney sa akong atubangan, di na gyud ko niya. No more na gyud.”

Ambot kon nakasabot ba kaha si Nymfa sa grabeng kasuko ko kang Rodney.

“I know, Gaw. Mao bitaw nga kanuay kong ipahinumdom nimo si Rodney ug ang iyang uyab sa Mandaue bisag nagbuwag na sila. Ayaw na gyud kang Rodney, Gaw. Naay daghang laki nga mas labaw pa kaguwapo kang Rodney.”

Unya kalit nga dunay misantop sa akong hunahuna.

“Taym sa, Gaw. Nganong nakahibawo ka man nga dunay uyab si Rodney nga taga Mandaue?”

“Kuan man gud, Gaw, kausa nakita ko siya nga dunay kuyog nga girl. Nag-holding hands sila. It means nga uyab gyud sila kay sweet man kaayo ang girl kang Rodney. Then, misakay na silag dyip depasaheroan. Ambot asa kaha to sila paingon.”

Nahilom ko. Gihunahuna ko pag-ayo ang gisulti ni Nymfa nako.

“Gipangutana ko man sab si Rodney, Gaw, giingnan ko siya nga nakakita ko niya ug sa babaye nga iyang gika-holding hands. Mitug-an siya nako nga uyab niya ang girl ug mao lagi, nagpuyo kini sa Mandaue.”

“Pero, Gaw Nymfa, Enhanced Community Quarentine man ang Mandaue? Nakalugar pa diay si Rodney ug ang giingon mong uyab sa pagsuruy-suroy? Gidili baya ni. Wa man say dyip nga nagbiyahe.”

“Basta, tinuod ang gitug-an ko nimo, Gaw.” Sa tuno sa tingog ni Nymfa, nasabtan nako nga mora siyag nasuko.

“Mituo ko nimo, Gaw. Di na gyud ko kang Rodney!”

Gipabatyag ko sa akong cousin nga nawala na ang gugma ko kang Rodney.

“Kana, Gaw. Ipakita gyud ngadto kang Rodney nga di kana gyud niya.”

Nabatyagan nako nga malipayon na ang tingog sa akong cousin. Unya, gihunong ko na ang among pag-estorya sa selpon. Duna koy gihunahuna pag-ayo bahin kang Nymfa. Morag nagduda na ko sa akong cousin.

(SUMPAYAN)