PRAKTIS SA PBA MANUGBALIK NA
Posibleng magsugod na og praktis ang teams sa Philippine Basketball Association (PBA) inig human sa ikatulong quarantine extension sa Metro Manila karong Marso 31, 2020.
Hinuon nagdepende kini sa lagda nga ipakanaog sa Inter-Agency Task Force (IATF).
Ang Metro Manila Council, nga gilangkuban og 16 ka mga siyudad ug usa ka munisipalidad, naglaraw nang ikanaog ang modified enhanced community quarantine (MECQ) ngadto sa general community quarantine (GCQ) sa National
Capital Region.
Ubos sa GCQ, pagatugtan nang ibalik ang ubang sporting events.
"Mass gatherings such as, but not limited to, movie screenings, concerts, sporting events, and other entertainment activities, community assemblies and non-essential work gatherings shall be allowed provided that participants shall be limited to 50-percent of the venue or seating capacity," pamahayag sa labing bag-ong lagda sa Iatf.
Usa kini ka maanindot nga musika sa pandungog sa PBA officials, nga nanghinaot nga makasugod na og training ang teams alang sa pagbalik sa mga aksyon sa liga.
Aron pagsunod sa lagda sa IATF, naglaraw ang PBA nga tugtan ang ilang teams nga maka-training bisan lima lang ka mga magduduwa sa matag session.
"Unti-unting balik sa normal ang plano ng gobyerno, at yun din naman ang tinitignan ng PBA. First is the set of guidelines for the return to practice. Under the general community quarantine, allowed na ang gathering ng small group, so baka naman pwede na rin mag-work out ang team ng four or five players per session," batbat ni PBA commissioner Willie Marcial nga napatik sa www.pba.ph.
Sa kasamtangan, ang teams naghatag og kamanduan sa ilang mga magduduwa nga magpakondisyon lang una sa ilang tagsatagsa ka panimalay.
Kon itugot sa kahigayunan, nagplano si Marcial nga ibalik ang mga kombati sa liga karong Hulyo, 2020.