Sarap ng buhay
Sayong nahuman ang sesyon sa Senado niadtong Martes. Usa ka hybrid plenary session ang ilang gihimo. Di tanang mga senador nitambong sa hawanan sa Senado tungod sa social distancing. Ang uban niapil sa sesyon pinaagi sa teleconferencing. Usa kanila, si Senador Ronald “Bato” dela Rosa.
Tungod kay sayong nahuman, nakaingon si Bato ngadto sa iyang mga kaubang senador, “Sarap ng buhay, sarap ng buhay, gan’to na lang tayo palagi ha?” Maayo na lang gani kay si Bato, kanhi hepe sa Philippine National Police (PNP), wa moingon nga, “Kini. Hayahay pas pulis.”
Nalipay si Bato nga sayong nahuman ang sesyon ug nakaingon siya, “sarap ng buhay.” Apan ang iyang gisulti bating paminawon sa mga nawad-an og trabaho tungod sa Covid-19 unya wa pa gyud kadawat sa cash assistance ubos sa Social Amelioration Program nga kon pangutan-on, “Kumustang hanapbuhay,” motubag nga, “Buhay pa lagi, pero hanap.”
○○○
Sa iyang mensahe ngadto sa mga reporter, si Bato niingon nga nalitok niya ang maong mga pulong tungod kay mas “efficient” karon ang ilang session nga gihimo pinaagi sa teleconferencing.
“Kaya nasabi kong ang sarap nang buhay kasi mas mabilis ang talakayan ng bills kapag naka-(WebEx) kami at mas maaga matapos ang session,” matod pa ni Bato. Sa laktod, mas dali ang pagtuki sa mga balaudnon, mas daling nahuman ang sesyon. Apan kay nahimong viral sa
social media ang gisulti ni Bato nga “Sarap ng buhay!” patambungon na gyud siya sa sesyon sa Senado, physically, karong Lunes, matod pa ni Senate President Vicente Sotto III.
Mao ni ang nakaparat kon mosikat ka sa social media. Patambungon na hinuon ka sa sesyon, imbis mogamit ra sa
WebEx, usa ka teleconferencing platform, nga mas hayahay unta kaayo kay sa moadto ka pa sa Senado.
Ang direktiba nga patambungon gyud si Bato nagagikan nila ni Sotto, Senador Panfilo Lacson, Francis Tolentino ug Sherwin Gatchalian. Ang upat physically present sa sesyon sa Senado niadtong Martes.
Unsa man kahay ikasulti ni Bato kon motambong siya physically sa Senado? Dunay tubag si Senate Majority Leader Juan Miguel Zubiri. Matod niya, dala ang pasiaw, “Para yung
statement niya (Dela Rosa) will be pagkatapos, ‘Mahirap na ang buhay,’ kasi hanggang alas-10 nandiyan ka pa sa Senado.”