Kontra ECQ

Kadaghanan sa mga tawo buot na gayud nga mahaw-as gikan sa enhanced community quarantine (ECQ) ug kon mahimo, maubos na sa general community quarantine (GCQ) ang ilang lugar. Adunay daghang nakapangutana nganong gipangayo nila ni Cebu City Mayor Edgardo Labella, Mandaue City Mayor Jonas Cortes ug Lapu-Lapu City Mayor Junard Chan nga mabalik sa ECQ? Ang siyudad sa Sugbo gipaubos na unta sa modified enhanced community quarantine (MECQ) ug ang mga siyudad sa Mandaue ubos na unta sa GCQ apan gibalik sila sa ECQ tungod sa ilang petisyon ngadto sa Inter-Agency Task Force on Emerging Infectious Diseases (IATF-EID). Laing mi-petisyon mao ang Lapu-Lapu City, apan wala mosugot ang IATF.

Wa makasabut ang katawhan nganong gusto man og ECQ ang maong mga dakbayan nga si Gobernador Gwendolyn Garcia sa lalawigan sa Sugbo malipayon man nga midawat sa ilang pagka-downgrade sa GCQ. Nakapangutana sila kon unsa man ang kadaut nga dala sa GCQ sa Lapu-Lapu?

Apan tungod tingali sa pagpangisug sa mga negosyante ug sa kadaghanang mga tawo, uyon na ang maong mga mayor nga mahimong MECQ o kaha GCQ. Naghuwat na lang sila sa hukom sa IATF kon dili ba sila ipabilin nga ECQ.

Lahi ang panlangtaw sa mga mayor sa National Capital Region (NCR) kay nag-miting na sila ug ila nang gihisgutan ang mga lakang kon ma-ubos na sila sa GCQ. Gusto nila nga silang tanang sakop sa NCR mapareho og category. Buot usab nila nga hatagan sila og katungod nga mobutang sa lockdown sa mga sitio ug barangay nga ilang tuho-an nga risgo.

Nagtuo ako nga GCQ, labi na gayud ang wala nay CQ kun kwarentinas, ang ambisyon karon sa katawhan, dili lamang sa kalaay kon dili sa kagutom tungod kay daghan kanila ang nawad-an og trabaho. Mao usab ang mga negosyante nga dugay nang nasirado ang ilang mga negusyo. Sumala pa sa mga tawo nga gigutom nga sa kwarintina dili man tingali sila mamatay sa coronavirus, apan matigbak sa kagutom.

○ ○ ○

Unsa man gayud ang tinuod nga kahimtang sa sitio Zapatera, Bgy. Luz, Cebu City? Makapangutana kita niini tungod kay ang mga molupyo sa maong dapit naglibug na sa ilang kahimtang karon. Ang maong dapit gi-lockdown niadtong Abril 7. Gilibkas kini ni Mayor Edgardo Labella niadtong Mayo 20, apan gisirado kini pagbalik sa mga pulis ug sa taga-city health department sa pagka-ugma. Apan ang tigpamaba sa mayor Atty. Rey Gealon mi-insister nga gilibkas na ang lockdown sa sitio Zapatera og mao kini ang angay tumanon.

Nganong aduna may miscommunication sa tali sa City Hall ug sa City Health Department. Nagsugod kini sa wala pagkasinabut nila ni City Administrator Atty. Floro Casas ug city health officer Dr. Daisy Villa. Naglambigit gihapon kini sa city health ug sa buhatan na gayud sa mayor. Si kinsa man ang sad-an niini? Nganong wala man mahibawo si Mayor Labella nga gi-lockdown diay sa mga pulis ug city health ang sitio Zapatera? Dili ba diay managhid usa sa mayor ang iyang subordinates usa kini mobali sa iyang desisyon?

(mannyrabacal1144@gmail.com)