For you, no more

Anang pagka gabii, naglisu-liso ko sa akong higdaanan. Nahasol kaayo ko. Kinsay akong tuhoan, si Nymfa nga akong cousin, o si Rose nga akong best friend? Si Rose nagpakitag pagdapig kang Rodney, samtang si Nymfa nagpakitag concern nako pinaagi sa pagtug-an nako nga dunay laing girlfriend si Rodney?

Nagbuntag kong wa makatulog. Morag di ko gustong mogawas sa akong kuwarto kay gibati gyud nako ang kakapoy

sa akong lawas ug morag katulgon na kaayo ko. Hangtod nga nakatulog gyud ko.

Hapit na maudto sa akong pagmata. Misulod si Mama sa akong kuwarto.

“Wa lang tika pukawa, Mercy, kay nindot kaayo ang imong pagkatulog. First time ka nga naingon ani. Ngano man?”

Gitug-anan ko si Mama sa tanan. Milingkod ko sa ngilit sa akong kama. Mitapad paglingkod si Mama nako. Nagkatinan-away mi. Mikupot si Mama sa duha ka kamot.

“Tagaig higayon si Rodney nga makapagawas sa iyang bahin, Mercy. Ayaw dayon siya hukmi.”

Miginhawa kog sagunson. Unsaon man gud, sukad pa kagabii nga naghuot ang akong dughan sa kaguol. Husto si Mama. Angay tuod nga paminawon ko ang unsa man nga isulti ni Rodney nako. Husto si Mama nga di ko angay nga hukman dayon ang akong boyfriend.

“Mao nay buhata, Mercy. Hunahunaa nga dugay-dugay gyud mong nagkarelasyon si Rodney, unya, tungod lang sa gitug-an ni Nymfa nimo, modesisyon dayon ka nga sad-an si Rodney sa inyong relasyon? Unfair kang Rodney kon di nimo paminawon ang iyang side.”

Nakaila na ang akong mga ginikanan kang Rodney kay kanunay man siyang nagpamisitahan nako kon way klase. Gawas pa, ilado ang pamilya nila ni Rodney sa among lungsod. Nailhan nga mga buotan ug mahadlukon sa Diyos ang pamilya ni Rodney.

“Tumanon ko ang imong giingon, Ma. Salamat sa imong pagtambag nako.”

“Ayaw dayon pagtuo sa giingon sa imong cousin. Pagumangkon tuod nako siya kay igsuon man nako ang iyang Papa, pero nakahibawo ka kon unsa ang kinaiya ni Nymfa bisag di kaayo mo suod.”

Nahilom ko. Nakahibawo ko nga playgirl si Nymfa.