Leyte dunay 3 ka kaso sa Covid
Leyte--Tulo ka kompirmadong mga kaso sa coronavirus disease (Covid-19) natala sa lalawigan sa Leyte.
Ang duha ka mga pasyente nakaapil sa Balik Probinsya Program samtang ang usa, overseas Filipino worker (OFW).
Sa Biyernes, Mayo 29, gianunsyo sa Department of Health (DOH) Eastern Visayas ang duha ka kompirmadong kaso sa Covid-19 sa Leyte.
Usa sa Baybay City ug usa sa Tanauan, Leyte. Sa Baybay City, ang pasyente usa ka 28 anyos nga lalake nga nisakay og bus gikan sa kaulohan ug niabot niadtong Mayo 21 sa Palo, Leyte.
Ang usa ka pasyente gikan sa Tanauan, usa ka 26 anyos nga lalake nga nakaapil usab sa Balik Probinsya Program.
Mayo 29, gikompirmar usab sa DOH-EV nga nakatala usa og usa ka kompirmadong kaso sa Covid-19 ang Hilongos, Leyte.
Ang pasyente usa ka 31 anyos nga lalake, usa ka OFW nga nagtrabaho sa cruise ship ug nisakay og eroplano gikan Manila ug niabot sa Tacloban City niadtong Mayo 25. Asymptomatic ang pasyente ug kasamtangan nga gi-isolate sa Hilongos
Leyte Isolation Center.
Gi-isolate na usab ang taga Baybay ug Tanauan ug nagpadayun ang contact tracing.
Sayo ning semanaha, nasagmuyo si Ormoc City Mayor Richard Gomez sa pipila ka national government agency gumikan sa kalit nga pagpauli sa mga OFW ug locally stranded individual sa Leyte.
Matod sa mayor nga way saktong koordinasyon ug impormasyon nga gihatag ang national government sa pagpauli.
“Hindi po kami nagmamarunong at hindi po ito contest ng pagalingan. Trabaho lang oo. Kung nananatili kaming Covid negative, it is not for personal glory, because at the core of every effort we put out there is the commitment to protect and save lives of our people. Yun lang ho yung goal,” matod ni Gomez.
Tuyo ni Gomez nga masusi usa nila kon taga Ormoc ba gyod ang nanguli ug dunay bay mga papeles ug niagi na ba og Covid test.
Base sa kamanduan sa Inter Agency Task Force ug Department of Interior and Local Government (DILG), dapat pahibaw-on ang LGU tulo ka adlaw una pa ang pag-uli.