CEBU CITY GCQ NA SA LUNES
APIL ANG MANDAUE, TIBUOK CV; MALLS BUKSAN NA
Human sa kapin duha ka buwan nga gipaubos sa enhanced community quarantine (ECQ) ang Dakbayan sa Sugbo ug Mandaue, ipaubos na kini sa general community quarantine (GCQ) sugod karong Lunes, Hunyo 1 hangtod Hunyo 15.
Kini subay na usab sa rekomendasyon sa Inter-Agency Task Force for the Management of Emerging Infectious Diseases (IATF-EID) Resolution No. 41 nga giluwatan niadtong Biyernes, Mayo 29.
Nagsanong usab kini sa hangyo ni Cebu City Mayor Edgardo Labella nga ipaubos sa GCQ ang dakbayan, inay sa modified enhanced community quarantine (MECQ) nga unang hukom sa IATF sa tunga-tunga sa semana.
Lakip nga ipaubos na sa GCQ ang dakbayan sa Mandaue nga mao nalang ang nahabilin uban sa Cebu City nga anaa sa ECQ.
Base sa resolution no. 41, lukop Central Visayas ang gipaubos sa GCQ.
Niini, buksan na ang malls, apan pabiling gidili ang pag-abli sa entertainment ug sports joints.
“While classified as high risk areas, all HUCs of the National Capital Region (NCR) and the Municipality of Pateros, and Cebu City shall be placed under general community quarantine (GCQ) until 15 June 2020,” tipik sa resolution.
Bisan tuod kon gilugakan ang mga gidili, si Labella niingon nga pabiling estrikto ang mga awtoridad sa pagpatuman sa pagsul-ob og face mask ug social distancing.
“While we reopen, we have to continue observing the health protocol. We have to remember the virus is still here,” matod ni Labella.
Sayo pa, si Labella niingon nga bisan gilugakan na ang quarantine status sa siyudad, duna gihapoy lockdown sa mga lugar nga ang coronavirus disease (Covid-19) mosulbong pa.
Sa public transportation, si Labella niingon nga siya makigtagbo sa Land Transportation Franchising and Regulatory Board (LTFRB) aron pagtuki sa kahimtang sa transportasyon sa siyudad sa pagsugod na sa GCQ sa Lunes.
Makigsulti usab siya sa Maritime Industry Authority (Marina) aron hisgutan ang pagbukas sa mga pantalan sa siyudad.
Iyang luwatan karong adlawa, Mayo 31, ang guidelines alang sa GCQ status.
Samtang, gimandoan usab ang RIATF nga i-monitor ang health system performance, capacity, ug strict compliance sa surveillance, isolation ug treatment protocol sa dakbayan sa Sugbo.
Lakip sa giuyonan nga ablihan na atol sa GCQ kining barbershops ug salons sugod Hunyo 7, diin 30% operational capacity una kini hangtod nga hinay-hinay nga mag-50% operational capacity, depende sa dapit niini kon nasubay sa social distancing.
Giklaro na ni Presidential Spokesperson Harry Roque nga tupi ra ang pwede sa barbershop ug salons.
Base sa Omnibus Guidelines sa GCQ, pabilin nga naka-stay at home ang 21-anyos ug paubos, 60-anyos ug pataas ug tanang aduna’y gipamati o aduna’y sakit.
Mamahimo na usab nga makabalik sa trabaho ang tanang kawani sa gobyerno nga buhatan depende kon gikinahanglan nga mo-report.
BUS SA MANDAUE
Giandam nga mga bus sa Dakbayan sa Mandaue City makalabang na sa mga border control point sa mga kasikbit nga dakbayan ug lungsod human nga gipaubos sa GCQ.
Sa milabayng adlaw, gianunsyo sa Kagamhanan sa Dakbayan sa Mandaue nga nag-andam sila og 120 ka mga bus nga musugod na og byahe sa Lunes.
Ang rota sa mga bus gikan sa dakbayan sa Mandaue paingon sa Lungsod sa Liloan, dakbayan sa Sugbo, Dakbayan sa Lapu-Lapu, kansang rota carousel.
Giklaro ni Atty. John Eddu Ibanez, executive secreatry ni Mandaue City Mayor Jonas Cortes, nga ang makasakay sa mga bus nga mulabang sa border points mga trabahante lang ug indibidwal nga adunay essential nga tuyo sa kasikbit nga dakbayan o lungsod.
Ang mga trabahante ipresentar lang nila ang ilang company ID ug certificate of employment aron sila makasakay.
Nagsugod sa P11 ang plete sa unang lima ka kiometros ug P1.85 sa matag mosunod nga kilometero.
Gipasabot ni Ibanez nga mamahimo gihapon nga makasakay ang mga dili trabahante, apan kutob lang sila sa dakbayan sa Mandaue ug kinahanglna sab nila ipakita ang ilang quarantine pass.
Di mamahimong makakompra ang mga residente sa Mandaue sa kasikbit nga dakbayan, sigon ni Ibanez.
Bisan giluagan na ang community quarantine sa dakbayan ug abli na ang ubang mga establisemento, sigon ni Ibanez, di kini pasabot nga mamahimo nang makagawas gawas ang mga residente.
Ang tumong sa pagluag sa mga restriksyon aron ang ubang mga establisemento maka-operate na g magpadayon na ang panginabuhi sa mga trabahante.
Matod sab ni Ibanez nga pipila na ka mga establisemento ang nakakuha na sa ilang special permit to operate.
Padayon sab nga ipatuman sa dakbayan ang number coding sa mga sakyanan, market day, ug mga health protocol sama sa pagsul-ob face mask, social distancing, ug paghugas sa kamot.
Ang lokal nga pangagamhanan sa dakbayan sa Mandaue musunod lang sa mga guideline nga ipagawas sa IATF-EID.
Gikatakdang mopagawas og executive order si Cortes mahitungod sa mga guideline sa pagpatuman sa GCQ /