30 ka pulis nga may Covid-19 ibalhin sa pasilidad sa Taptap

Kapin sa 30 ka mga pulis sa Cebu City Police Office (CCPO) nga nagpositibo sa Covid-19 ibalhin karong, Dominggo, Mayo 31, sa Cremdec Center sa Barangay Taptap sa bukirang dapit sa siyudad sa Sugbo nga gihimong Makatao, Malasakit Recovery Center.

Biyernes sa hapon, Mayo 30, ang Cremdec Center gibendisyonan isip laing pasilidad sa nataptan sa Covid-19 sa dakbayan.

Ang seremonyas sa pagbendisyon gitambongan nila ni Police Brigadier General Albert Ignatius Ferro, direktor sa Police Regional Office (PRO) 7 ug Cebu City Mayor Edgardo Labella.

Gihimo dayon sa kapulisan ang dry run uban sa medical quick response team sa Regional Health Service 7 ug sa Cebu City Health Department aron masayran unsay gikinahanglan nga palambuon.

Matod ni Ferro, ang PRO 7 adunay pundo alang sa gasto sa mga personnel nga ipaubos sa kapin 20 ka adlaw nga isolation inabagan usab sa kagamhanan sa dakbayan sa Sugbo nga gisaad ni Labella.

Dako usab sa natabang, matod ni Ferro, ang Office of the Presidential Assistant to the Visayas (Opav) alang sa gasto sa maong mga pulis.

Pasabot sa heneral nga dili lang mga police ang ibutang sa Cremdec lakip na kadtong frontliners nga magpositibo sa coronavirus.

“We might accept the other frontliners, our priority. We are with them in this fight and we will help them as well,” matod ni Ferro.

Si Labella misaad nga andam ang Cebu City Hall nga

mohatag pa sa mga pangihanglanon sa Makatao, Malasakit Recovery Center andam niya kining ihatag.

“If there is something that you still need, feel free to approach us and I will not hesitate (to extend our help). If this facility is not enough, ask for more for as long as we can provide the best recovery system and health to our policemen or on our frontlines fighting this invisible enemy.” Matod ni Labella. Kompleto sa mga kagamitan ang maong pasilidad sama sa ilang tulganan lakip na ang mga gamit sa sports.

Gisiguro sa PRO-7 nga maatiman ang mga police nga kinahanglan dili sila makuwangan sama nalang sa tubig nga pang kaligo ug tubig nga mainom.

Adunay gi assigned ang kagamhanan sa dakbayan nga nutritionist nga maoy mo andam sa pagkaon sa mga police.

Tinguha ni Ferro nga mokaon og mga masustansya nga pagkaon sama sa gulay ug isda aron motaas ang ilang resistensya samtang nakigbatok sila sa coronavirus.

“Kinahanglan healthy ang pagkaon sa atung mga police,” dugang ni Ferro.

Gitakdang ipa-swab test sa pagbalik ang kapin sa 30 ka mga pulis nga nagpositibo sa Covid-19 sa mosunod nga mga adlaw nga gihulagway ni Ferro nga himsog ra ang kahimtang sa panglawas.