Cebu City GCQ na

Sugod ugmang adlawa, Hunyo 1 hangtod sa Hunyo 15, ubos na sa general community quarantine (GCQ) ang dakbayan sa Sugbo. Base kini sa bag-ong kamanduan sa Inter-Agency Task Force for the Management of Emerging Infectious Disease (IATF-MEID) nunot sa hangyo ni Mayor Edgardo Labella.

Gamay ra ang kailanan sa GCQ sa enhanced community quarantine (ECQ) diin gipa-ubos ang dakbayan sulod sa duha ka buwan. Abre na ang pipila ka mga balay patigayon, apan kadtong essentials lang. Tugutan na ang public transport, apan ang buses lamang. Di gihapon tugotan ang public utility jeepneys (PUJ), angkas sa motorcycle ug habal-habal.

Dako ba nga factor ang rapid mass testing nga gihimo sa tulo ka mga dakbayan sa desisyon sa IATF pagpa-ubos na sa GCQ? Dako daw og natampu, matod pa ni Mayor Labella. Ingon man usab ang gidaghanon sa mga naka-recover sa Covid 19. Preparado usab ang Cebu City, matod pa sa mayor.

Mobukas nag balik ang commercial establishments sama sa shopping malls, restaurants ug uban pa. Apan close gihapon ang leisure ug entertainment centers sama sa mga senihan ug concerts. Magdasok na ang mga tawo.

Medyo relax gamay ang GCQ. Mao kini ang gikahadlukan karon kay misaka man gani ang gidaghanon sa mga nag-positibo sa dihang ubos pa sa ECQ ang dakbayan nga hugot kaayo ang restrictions, karon pa kaha nga medyo luag na? Wala man gani mosunod ang mga tawo sa ECQ nga medyo estrikto pa ang policy sa ‘stay at home,’ karon pa kaha sa GCQ?

Gibali-wala lang sa uban ang mga lagda niadtong ECQ hinungdan nga mikuyanap ang Covid 19. Mao lagi na nga dili man usab madugay ang implementasyon sa ECQ gumikan sa ekonomikanhong rason. Daghan man ang nagutman ug dili puwede nga magsalig na lang ang kadaghanan sa ayuda gikan sa kagamhanan kay mahutdan o nahutdan naman gani og resources ang gobiyerno. Mao nga bisan lugak na gamay ang atong mga polisiya, magmatngon na lang gyud ta. (bobbygnalzaro@ gmail.com)