Umari ka o Espiritu Santo!

Karong Dominggo maoy giila nga adlawng natawhan sa Simbahan, ang Pagkunsad sa Espiritu Santo. Kalim-an ka adlaw na sukad sa Pagkabanhaw ni Jesus. Ang pag-ihap niini binasi sa unang kapitulo sa Mga Buhat sa mga Apostol diin gihisgotan ang Pagkayab ni Jesus ngadto sa kalangitan. Apan sa ebanghelyo ni Juan ang pagkabanhaw, pagkayab, ug ang paghatag ni Jesus sa Espiritu nahitabo sa samang adlaw. Buot ipalutaw sa maong ebanghelyo nga kining tulo nga panghitabo maoy mikabat sa gitawag nga Misteryo Paskuwal, nga ang pagkamatay ni Jesus mao usab ang takna sa iyang pagdawat sa himaya nga iyaha sa wala pa gimugna ang kalibotan.

Human huyopi ni Jesus ang iyang mga tinun-an miingon siya:

“Dawata ninyo ang Espiritu Santo”. Kining pulong “dawat” aktibo nga pagdawat, wala naglutaw kun nagnunotnunot lamang ni nagsakmit kon nagbuotbuot, kondili mapangakuhon ug bukas ang palad sa pagdawat sa gasa.

Daghang higayon sa atong kinabuhi nga makadawat kita og gasa ug uban pang mga butang. Makadawat kitag gasa gikan sa maninoy, mga pahalipay, suweldo ug bonus, ug uban pa. Sa ikapito nga kapitulo ni Juan, misaad sa Jesus nga sa iyang mga magtutuo nga makadawat sila og gasa kay gikan “sa iyang ginhawaan modagayday ang mga sapa sa buhing tubig”.

Gisaad na diay ang Espiritu Santo ug natuman ang saad sa dihang mitayhop si Jesus sa iyang mga tinun-an. Nagpasiugdag hatag ang Dios, ang tawo modawat nga mapaubsanon

Binasi sa Mga Buhat 2:1-11; Salmo 104; 1 Taga Corinto 12:3-7, 12-13; Juan 20:19-23 ug mapasalamaton.

Gipalutaw sa Mga Buhat ang kalambigitan sa maong pagkunsad sa pangilin sa mga Judio nga mao ang orihinal nga Pentekostes. Kini mao ang paghatag sa balaod ngadto kang Moises. Niining yugtoa, nahimong usa ka katawhan sa Dios ang mga Judio. Inubanan og kilat ug dalogdog ang yugto sa paghatag sa Balaod. Sa pagkunsad sa Espiritu sa Dios sa mga tinun-an, “may dahunog gikan sa langit, sama sa kusog nga huros sa hangin, ug milukop kini sa tibuok balay…nakakita silag daw mga dila nga kalayo nga nanugdon diha sa matag usa kanila”.

Diha sa sulat ngadto sa mga taga Corinto, mabasa nato nga “may nagkalainlaing mga hiyas nga epirituhanon, apan mao rang Espirituha ang naghatag niini. May nagkalainlaing paagi sa pag-alagad, apan mao rang Ginooha ang gilagaran”.

Ang pagpangalagad sa Ginoo usa ka gasa nga atong gidawat mismo sa Ginoo. Usa kini ka katungod diha sa tawhanong kinabuhi sa katilingban. Ang pagsimba tawhanong katungod nga anaa sa atong Batakang Balaod. Dili kini hinatag sa Estado kay gikan gyod kini sa Ginoo. Lisod sabton kon nganong grabe ang limitasyon sa pagsimba unya abrihan na ang malls ug uban pa diin magpunsisok ang tawo apan napulo ray tugtan nga mosimba. Basta sundon lang ang balaod mahitungod sa “social distancing” ug “hygiene”, makatarunganon lamang nga tugotan na sad ang mga tawo sa pagsimba.

Kanus-a pa kaha mahibalik ang pagbansay sa maong katungod?