Ayaw kalibog sa quarantine
Unsa man gyud ang klase sa quarantine nga mopatigbabaw sa Syudad sa Sugbo ugma? MGCQ? GCQ? Para nako, simple ra. Pulos ra gihapon na quarantine. Para luwas, mas maayo nga magpuyo gihapon sa balay.
Hinuon, naa nay dugang mga kapilian ang mga dunay tuyo mogawas sa balay. Risgo gihapon kay naa pa may mga positibo nga naglaaglaag sa gawas.
Apan makasabot ko sa konsiderasyon sa mga opisyal. Di mahimong manago na tanan kay kuyaw dili na makabangon pagbalik ang atong ekonomiya. Di mahimong padayong maghatag og hinabang ang kagamhanan.
Tinuod, naay pipila nga niburot kay nangurakot. Di man kalikayan nga kon makabentaha, mamentaha gyud. Ang mga tarong kay nasayop nga gipasagdan lang ang mga hiwi nga maghari. Hahaha! Apan, kinahanglang mobalik ang ekonomiya kay wa na may tinubdan sa mga buhis kon padayong sirado ang mga negusyo ug way income ang mga propesyonal ug mga yanong empleyado.
Maglalis man kita kon sakto ba ang lakang sa kagamhanan, kon atong analisahon pag-ayo, makaingon kita nga nagsugod na karong Hunyo 1, 2020 ang proseso sa pagtindog pagbalik sa atong ekonomiya.
Tataw alang kanako nga sama sa sugal ang gibuhat karon. Posible man gyud nga moulbo pagbalik ang pagdaghan sa mga positibo sa Covid-19. Apan, makontrol lang kini, atong masugdan ang maingon nato nga economic recovery.
Ang mga lakang nga kombinasyon sa pagsiguro sa panglawas ug ang pagpabuhi sa ekonomiya moresulta mga gimbut-an, mga paagi, ang kultura nga malakip sa gitawag nato og “new normal.”
Alang kanako, kining maong proseso sa economic recovery dili dali buhaton.
Daghan ang sama kanako nga nahadlok. Bisan pag gamay ang namatay sa Covid-19, hunahunaa ang labing minus nga 14 ka adlaw nga isolation. Lahi sa quarantine nga makuyog ka sa imong pamilya, ang isolation kay ikaw rang usa aron dili matakdan ang uban.
Dayon, naa pa ang gasto. Maayo kon di mosubra sa gigahin sa Philhealth ang magasto sa hospital labi na og naa ka magpatambal sa public hospital. Pili lang sa CCMC o sa VSMMC dinhi sa Sugbo.
Bisan pa man, duna sab gyuy wa mahadlok. Gani, duna koy kaila nga nagtuo nga binuang lang kining Covid-19 aron makanegusyo og rapid test ug mga PPE kun personal protective equipment.
Ako? Mopadayon ko sa quarantine. Hinuon, wa ko moingon nga magtago ra ko sa balay sulod sa sunod unom ka bulan. Tingale, sulod lang sa pipila ka semana ug maniid sa kahimtang sa gawas.
Nagtuo ko nga daghan ang pareho kanako nga magpanagana sa paggawas sa balay. Di baya lalim gyud kon matakdan.
Apan depende kini sa ipakanaog nga guidelines ug atong obserbasyon sa epekto niini.