A certain sadness
Nalipay ko kay gihimo nang General Community Quarentine ang probinsiya sa Cebu, ug kay nia man ko ron sa among lungsod, nakabalik na sab ko sa naandan kong exercise every morning nga mao ang pag-jogging.
As usual, sa luyo sa simbahan sa among lugar ko nagjogging. Dako ang wanang dinhi ug makabuylo gyud kog dagan-dagan. Unya milugsong ko ug motungas na sab. Nabutang sa bungtod nga dapit ang among simbahan ug over-looking
kini. Makita ang dako nga sports complex, ang highway, ang reclamation area diin nahimutang ang merkado sa lungsod, ug ang dagat.
Dihang gipaningot na ko pag-ayo, nag-hike na lang ko. Tungod aning akong exercise, kanunay piskay ang akong lawas. Kanunay kong abtik.
Unya miadto ko sa reclamation. Bugnaw kaayo ang hangin nga gikan sa lawod. Daghan sab ang nag-jogging ug nag-hike dinhi. Didto sa seawall, nakita ko na sab si Paul. Nag-sweater siya. Klaro nga midaot siya. Nag-atubang siya sa lawod, ug parehas sa naandan na, morag blangko ang iyang hunahuna.
Nakapanglingo na lang ko. Milingkod ko duol niya. Gitan-aw ko siya pag-ayo. Namiyahok gyud ang iyang aping, nga kaniadto lamurok kini ug puwahon. Apan karon, luspad na ang iyang aping.
Naanugnan ko kang Paul. Naundang siya sa pag-eskuwela sa miaging semester tungod sa nahitabo sa iyang lovelife. Klaro sa iyang hitsura ang frustrations ug ang kagulanan. Katulo na ka higayon nga napakyas siya sa gugma.
Childhood friend kami, ug dug-ol ra ang balay nga among gipuy-an. Malipayon ug dasig nga pagka tawo si Paul kaniadto. Klasmet mi gikan sa elementary hangtod na sa hayiskol. Kami ang kanunay magkuyog sa pagpaingon sa eskuwelahan sa among lungsod ug ingon man sa among pagpauli. Suod kaayo mi. Apan midistansiya si Paul nako dihang nakatrato na siya, graduating na mi sa hayiskol.
True love gyud kuno niya ang girl, maoy iyang sulti nako. Apan nakigbuwag ang babaye niya.
Nakahilak si Paul. Sa pag-eskuwela namo sa first year college, nakakita na sab siyag girlfriend apan namatay kini sa usa ka car accident. Sa ikatulong higayon sa iyang pagpakigrelasyon og babaye, wa na usab kini mo-prosper kay namatay ang babaye.
(SUMPAYAN)