Balaudnon ni Cayetano
Giimbetar unta ko isip usa sa mga representante sa public discussion sa Senado sa balaudnon ni Senador Pia Cayetano nga gitumong pagbutang og bike lanes sa kadalanan, labina sa panahon karon sa pandemic.
Apan sa 11th hour nibalibad ko kay dunay mga kalambuan nga mas importante kaayo sa among trabaho sa Sunstar. Lisod magtabi ka nga wa ka sa huna-huna.
Anyway, kami sa Tindak Bisdak Cebu Folding Bike Society hugot kaayong nagsuporta sa pagbutang og bike lanes sa mga karsada sa Pilipinas. Labina gyud sa exclusive lanes sa mga biseklita ug uban pang matang sa non-motorized transportation. Busa, naa man ang balaudnon ni Senador Cayetano, amo ning gisuportahan.
Kami gani, nagkampanya dinhi sa Dakbayan sa Sugbo alang sa bike lanes. Gani, duna may ordinansa ang Siyudad alang sa bike lanes nga naumol human sa taas nga konsultasyon tali kanamong bikers diri sa siyudad.
Ang balaudnon sa senador, makapalig-on pag maayo sa ordinansa sa siyudad ug hayan, maghatag og hayag nga dan alang sa katumanan sa among damgo. Ang nakanindot kay duna nay pagtuon nga gihimo kaming bikers sa mga dapit diin haum kaayo ang pagbutang sa bike lanes.
MAKALIKAY
Kon magpuyo na kita sa “new normal,” naa lang gihapon ang mga health protocol: physical distance, pagsul-ob og face mask ug di magtapok.
Ang Japan gituohan unta nga grabeng maigo sa Covid-19, apan wa kini mahitabo. Ngano man? Naglisod ang mga sayantipiko sa pagsabot. Apan, gituohan nga kini tungod sa tulo: gilikayan ang close physical contact; closed nga mga lugar ug panagtapok.
Sa pagsakay og biseklita, kaning tulo malikayan kaayo. Di ka man motipon sa tapok sa mga tawo, sama sa bus stops. Di ka sab motipon sa mga tawo sud sa mga sakyanan.
Kaning tulo mahimo kaayo nimo pinaagi sa pagsakay sa biseklita. Di na lang nako balikon ang mga benepisyo.
MATUMAN UNTA
Karong panahuna, nanaghan ang mga tawo nga nagbiseklita. Hinaut pa nga ang balaudnon ni Senador Cayetano mapalabang sa Senado ug siya mismo, isip siklista, mokampanya sa awareness sa kaayuhan sa biseklita.
Ang wa makahibawo, si Senador Pia usa ka triathlete ug mismo, nakaapil na gani sa Ironman. Hinaut pa nga pinaagi niya, ang gidamgong bike lanes mabutang na sa kadalanan.