TABAL PADAYON NGA MALAUMON
Mitidlom na sab ang paglaom ni Cebu marathon queen Mary Joy Tabal nga makadagan og balik sa Olympics human sa kanselasyon sa Boston Marathon, usa sa qualifying races alang sa matag upat ka mga tuig nga kompetisyon.
Kagahapon, opisyal nga gianunsyo sa mga tigpasiugda sa Boston Marathon nga hingpit na nilang gikanselar ang lumba gumikan sa padayong hulga sa coronavirus disease 2019 (Covid-19).
Ang Boston Marathon orihinal nga gikatakda sa miaging buwan unya giuswag kini karon untang Septiyembre, 2020.
Apan niabot ang punto nga nakadesisyon ang mga tigpasiugda nga kanselahon ang lumba sa labing unang higayon.
"I believe the cancellation is for the good of everyone, not only for the runners but for the people
around the world. Right now, we should all be more concerned about the health and safety of our world than excellence in sports," matod ni Tabal, kinsa nakadagan na sa Rio Olympics .
Alang sa lumad nga taga Brgy. Guba, Cebu City, mas maayong mapahigayon ang Boston Marathon nga wala'y kabalak-an ang mga nangahilambigit.
"Like the Olympics, Boston Marathon is said to be the mother of all the marathons in the world and it will be best if we will have it at a time where it is surrounded with excitement and celebration rather than stress and anxiety," dugang ni Tabal.
"Boston Marathon might be cancelled this year but there will be another Boston Marathon in 2021 where everyone can better prepare for it again."
Ang Boston Marathon usa lang sa Olympic qualifying races nga tinguha untang salmutan ni Tabal.
Nakaparehistro unta siya sa Hongkong Standard Chartered Marathon niadtong Pebrero 9, 2020, Tokyo Marathon niadtong Marso 1, 2020, Seoul Int'l Marathon niadtong Marso 22, 2020, Paris Marathon niadtong Abril 5, 2020, ug Scotiabank Ottawa Marathon Canada niadtong Mayo 24, 2020 apan ang tanan wala nadayon tungod sa Covid-19.
Nagparehistro sab siya sa KL Standard Chartered Marathon karong Hunyo 21, 2020, Gold Coast Marathon Australia karong Hulyo 4, 2020 ug Berlin Marathon karong Septiyembre 22 apan dili gihapon kini madayon. Hinuon bisan sa daghang babag sa iyang pangandoy, padayon nga malaumon si Tabal ug gilantaw na lang niya ang positibo nga habig ning maong
mga panghitabo.
"It gave me more time to prepare for those races next year and mas safer to train especially running kay outdoor baya ni nga sports," pasabot ni Tabal. Bisan sa quarantine, si Tabal wala nagpasagad ug padayon kining nag-training sa iyang panimalay gamit ang treadmill.
Gipasabot ni Tabal nga ipadayon niya ang iyang pangandoy nga makadagan og balik sa Olympics pinaagi sa pagsalmot og qualifying event sa sunod tuig. Ang Tokyo Olympics, nga orihinal untang gikatakda karong Hulyo, 2020, giuswag sa sunod tuig sa samang buwan gumikan sa Covid-19.