AKSYON SA NBA IBALIK, HULYO 31

Gipahibalo ni Commissioner Adam Silver ang Board of Governors sa National Basketball Association (NBA) nga tinguha niyang ibalik ang mga aksyon sa liga sugod karong Hulyo 31, 2020.

Ang NBA maoy labing unang North American sports league nga ningsuspenso sa ilang mga duwa human nasuta nga usa sa ilang mga magduduwa ang positibo sa makalilisang nga coronavirus disease 2019 (Covid-19).

Hinuon gibutyag sa NBA spokesman nga ning puntoha, wala pa'y kompirmadong mga lakang nga pagabuhaton ang liga. Ang Board of Governors naghugpong kagahapon (RP time) apan wala kini nagkasinabot kon pila ka teams ang pabalikon og duwa. Matod sa usa ka tinubdan sa The Associated Press, ang labing posibleng mahitabo, 20 na lang sa 30 ka miyembrong teams sa liga ang pabalikon og duwa. Matod sa tinubdan nga padayon pang nanguha og mga impormasyon si Silver aron pagbalanse sa mga opsyon nga ilang gipangkonsiderar.

Aduna sab plano nga pabalikon ang teams nga nagkinahanglan na lang og unom ka mga daog aron makaseguro og luna sa playoffs.

Kini basi sa standings sa Eastern Conference ug Western Conference human nahunong ang aksyon sa liga niadtong Marso 11, 2020.

Si Silver, kinsa nakigtambayayong sa National Basketball Players Association (NBPA) kabahin ning maong isyu, wala ibutyag kon kanus-a mopagawas ang liga og pinal nga desisyon. Matod pa sa ESPN, nagplano ang mga kadagkuan sa NBA nga magpahigayon og botasyon kon uyonan ba sa liga ang bisan unsa nga rekomendasyon ni Silver.

Sa kasamtangan, dili tanang teams ang nakaabli na'g balik sa ilang practice facilities alang sa voluntary workouts. Nagpasabot kini nga aduna pa'y mga magduduwa ang wala sa saktong kondisyon ning puntoha.

Ang New York Knicks ug Washington Wizards nakaabli na'g balik sa ilang pasilidad kagahapon ug mosunod ang Boston Celtics karong Martes.

Ang teams nga wala pa nakapagawas og plano kabahin sa pag-abli sa ilang pasilidad mao ang Golden State Warriors, Detroit Pistons ug San Antonio Spurs.

Gawas sa kon pila ka teams ang pabalikon, ubay-ubay pa nga mga isyu ang kinahanglang sulbaron sa NBA hilabi na sa pinansyal nga aspeto. Nanghinaot si Silver nga masulbad na ang tanan aron makabalik na ang liga basi sa

iyang plano.

/ IMAGES.APP ■ LIDER: Ang Milwaukee Bucks ni Giannis Antetokounmpo (wa) ug Los Angeles Lakers ni LeBron James (tuo) mao ang nag-una human sa pagkahunong sa mga duwa sa NBA niadtong Marso 11, 2020. Nagplano ang NBA mobalik na karong Hulyo 31, 2020.