Dili mokompiyansa

Unang adlaw karon sa Hunyo, Lunes. Unang adlaw usab sa patas nang kuwarentina sa komunidad sa mga dakbayan ug lalawigan sa Sugbo, ubos sa general community quarantine (GCQ) nga gikatakda nga molungtad karong Hunyo 15. Seguro kadaghanan kanato nalipay sa naasoy nga kalamboan uban ni Mayor Edgardo Labella sa dakbayan sa Sugbo, kinsa nipadayag sa iyang hugot nga pasidaan nga dili mokompiyansa ug mosunod gihapon sa protocol aron paglikay sa laing pagsulbong sa kaso sa Covid-19.

Si Labella nipadala og suwat-apelasyon sa Inter-Agency Task Force for the Management of Emerging Infectious Diseases nga unang gideklarar nga sugod sa Hunyo 1, ang dakbayan sa Sugbo ug Mandaue nga ubos sa mas lugak nga modified general community quarantine (MGCQ) apan mihatag og konsiderasyon sa hangyo sa mayor.

Nagpasabot nga sugod karon, gipaluagan ang limitasyon sa kuwarentina hinungdan sa pag-abli sa halos tanang estabilisemento lakip sa transportasyon, apan katunga lang sa ilang operasyon sa pagseguro nga masunod ang physical distancing ug pagsul-ob og face mask.

Dili man kaha ka gusto nga dunay laing pagsutoy sa kaso sa Covid-19? Aw, mopatuo kita sa awhag sa mayor, awtoridad ug mga opisyal sa panglawas aron pagpadayon sa mas luag nga kuwarentina ngadto sa pag-establisar sa bag-ong normal.

Magmalampuson ang plano sa kagamhanan sa pagsanta sa pagkaylap sa sakit kon dunay tiunay nga kooperasyon ug pagpakabana gikan sa katawhan labi na sa labing kabus nga han-ay nga dakong risgo kanunay sa sakit.

Ang gobiyerno nipagawas og binilyon ka pesos nga salapi alang sa atong panglawas ug kaayohan sa nasod. 'Dili kita mokompiyansa' aron dili usab mausik ang kuwarta gikan sa atong buhis.

Magtamod kita sa karaang panultion, 'Ang himsog nga katawhan, dugukan sa kalamboan sa nasod.'