A certain sadness
Ang maong mga kapakyasan sa gugma ni Paul maoy nahimong rason nga nawad-an na siyag gana sa iyang kinabuhi. Napasagdan na niya ang iyang kaugalingon. Wa siya magtagad sa pagpatupi sa taas na niyang buhok. Bulingon na ang iyang pamiste. Mora na siyag buang nga naglakaw-lakaw sa kadalanan sa among lungsod.
Naamong sab ang iyang future kay miundang man siyag eskuwela.
“Demalas ko sa gugma,
Regine. Gitunglo ang akong lovelife sa kahigayonan.”
Kaniadto sa dayon nang undang ni Paul sa pagtungha, naghilak siya nga misumbong kanako sa frustrations niya sa gugma.
“Ayaw pag-ingon ana, Paul. Wa pa lang gyud moabot nimo ang babaye nga para gyud nimo. Ayaw pagpakawala sa paglaom.”
Naninguha ko nga matambagan niadtong higayona si Paul. Apan nagpasulabi gyud ang iyang kaguol. Nahimong miserable ang iyang kinabuhi. Kanunay makigsulti ang iyang Mama ug Papa nako. Naghangyo sila nga tabangan ko si Paul aron makalingkawas sa gihambin nga kasub-anan.
Apan ang tanan kong gitambag kang Paul wa niya tagda.
Mitindog ko sa akong gilingkoran nga konkretong lingkoranan sa seawall. Mitapad kog lingkod kang Paul nga nagsige gihapon og lantaw didto sa lawod ug blangko ang hunahuna. Wa ko magsunod sa social distancing. Wa man say pulis nga nag-roving sa reclamation area sa among lungsod. Nasingo ko ang kabaho ni Paul. Wa na gyud siya makahunahuna sa pagkaligo ug pag-ilis og limpiyo nga biste.
Kaluoy sa akong childhood friend. Hilom kong nakaingon. Tungod sa gugma, nahimo siyang makaluluoy di lang sa iyang panggawas nga hitsura kondi hangtod na sab sa iyang hunahuna ug kasingkasing. “Paul.”
Hinay kong gisangpit ang akong suod nga amigo. Wa siya magtagad nako. Morag wa siya makadungog nako. Kahilakon na ko sa gibati kong kaluoy kang Paul. “Paul.”
Miusab kog sangpit kaniya. Milingi siya nako. Dugay ko niyang gitan-aw. Unya inanay nga namatikdan nako nga nasuko siya, klaro sa iyang tinan-awan nako. “Pahilayo nako! Wa moy kapuslanang mga babaye! Nagmahal ko kaninyo pero inyo kong gibiyaan!”
Naghilak si Paul nga mitindog ug mipalayo nako.
(SUMPAYAN)