Ayaw og kompiyansa
Di nato sabton nga gumikan kay gipaubos na sa general community quarantine (GCQ) ang dakbayan sa Sugbo, luwas na kini sa gikalisangan nga coronavirus disease (Covid 19). Anaa gihapon kining balatian ug dili kini mawala hangtod nga adunay vaccine nga mamugna nga maka-kontrolar o tambal niini. Gibuksan lang ang patigayon gumikan sa ekonomiya. Kon wala lang unta magka-problema ang atong kagamhanan sa paghatag og ayuda sa katawhan gumikan sa epekto sa lockdown, magpabilin unta kita sa enhanced community quarantine (ECQ).
Sugod kagahapon, hangtod sa Hunyo 15, ubos na sa GCQ ang dakbayan sa Sugbo. Ubos sa maong estado, medyo relax na gamay og dili na tanto hugot ang restrictions. Makalihok-lihok na ang kadaghanan. Mobukas na ang shopping malls, apan alang lang niadtong importanteng mga palitonon. Di na sama kaniadto nga mahimong suyuranan lang ang malls. Limitado na ang store hours. Patyon naman gani ang airconditioning units ug wala nay internet connections aron wala nay magsuroy-suroy ug motambay.
Aduna nay public transportation apan ang buses lamang ang gitugutan. Apan gikinahanglan mga mosunod gihapon sa social distancing. Katunga ra ang pasakyon sa total capacity. Wa gihapoy jeepneys ang tugutan nga makabiyahe gumikan kay siguradong di makasunod sa social distancing. Wala gihapoy habal-habal ug Angkas. Ang number coding ipabilin gihapon. Siguradong mobalik na ang kahuot sa trapiko.
Ang restaurants bukas na usab apan wa usay tugutan nga “dine in” o mokaon sa sulod. Puro na lang “takeout” ug delivery. Labi pa gyud nga wa nay inum sulod sa restaurants ug bars. Dili na maghuot ang supermarkets ug groceries. Magtamod gihapon sa social distancing. Ang mga batan-on nga ubos sa 21 anyos ug mga nagedad 60 pataas gidid-an gihapon nga makagawas sa panimalay gawas lang kon adunay exemption.
Kon nakasagop kita sa duha ka buwan nga ubos kita sa lockdown, nga way gawas-gawas sa balay o naka-agwanta kita nga way shopping malls, entertainment ug kaon sa restaurants, way rason nga di kita maka-adjust ning GCQ. Disiplina lang ang gikinahanglan aron malikay kita sa Covid 19.