DTI 7, mata na!
Malipay? Angayan na ba ta nga magmaya karon nga nabalik na sa general community quarantine (GCQ) ang dakbayan sa Sugbo ingon man ang mga silingan nga dakbayan ug lungsod lakip na ang tibuok probinsya? Mga batos dili pa ni panahon nga maghudyaka ta sa kalipay. Gani, ato gihapon tumanon ang health protocol.
Ang katuyoan sa pagnaog sa GCQ human sa duha ka buwan nga ECQ, aron moabli ang mga negosyo nga nasira tungod sa Covid-19 ug makabalik sa trabaho ang dunay trabaho ug mobangon ang atong ekonomiya nga nalukapa sa corona.
Walay dakong kausaban ang pag-ubos sa GCQ gikan sa ECQ. Sa GCQ dunay pipila ka mga establisemento nga gitugtan nga moabli. Apan, dili tanan makagawas sa ilang panimalay gawas kon importante ang tuyo o mopalit sa panginahanglanon sa tawo ug sa balay.
Sa mga dili trabahante o empleyado, gikinahanglan gihapon nga magdala og quarantine pass kon mogawas sa ilang balay. Ang katuyoan nga magpirmi gihapon ta sa atong panimalay aron mapugngan ang pagkatap sa Covid-19. Gani, gidili pa ang mga pagpundok.
Gidid-an gihapon ang mga menor de edad (21 anyos paubos) ug senior citizens (60 anyos pataas), nga dunay sakit o balatian sa panglawas, gawas kon mamalit sa panginahanglanon sama sa pagkaon, medisina ug uban pa. Mao ni bahin sa mga orden sa IATF ug sa mga mayor nga gibaliwa o di ba kaha wa masabti sa mga gwardiya sa supermarkets.
Makadaghan na mahitabo nga dili pasudlon sa gwardiya sa supermarket, sama sa Robinson,
ang mga senior, nga maayo ug baskog pa ang panglawas tungod sa probisyon nga nagdili sa mga senior citizen nga mogawas sa ilang balay apan wala gibasa o gibaliwala sa mga gwardiya ang exemption alang sa mga senior citizen.
Subay sa balaod sa mga senior citizen (RA 9994) ug tungod sa Covid-19, si Trade Sec. Ramon M. Lopez nagpagawas niadtong Marso 28, 2020 og DTI Memorandum Circular 20-09, nga giulohan “Pagpahalaga sa mga Senior Citizens” kon paghatag og bili sa mga edaran.
Sa pagsugod sa lockdown, ang mga supermarket gitugtan nga maninda apan ilang gibaliwa ang mga katungod ug pribilihiyo sa mga senior citizen nga gilagda sa RA 9994. Ang mga gwardiya, naay uban kuwang sa pamatasan nga morag nagtuo nga di sila matiguwang, nga isog kaayo mopalinya sa mga tiguwang.
Ang “Section 1, Objective” sa DTI Memorandum Circular 20-09, nagmando sa mga supermarket, grocery, pharmacy ug ubang establisemento nga gitugtan nga mangabli ubos sa State of Public Health Emergency nga unahon og atiman ang mga senior citizen. Sa ato pa, di palinyhon, atol sa ilang pagpamalit sa pagkaon ug tambal. Ang silot sa mosupak sama sa silot sa di motuman sa RA 9994. Sa Section 6, gimandoan usab ang mga supermarket nga magbutang og notisya aning Memo Circular 20-09.
Sa akong personal nga kasinatian, wa man ni gituman sa mga supermarket labina sa Robinsons. Mangutana ko sa DTI-7 dinhi sa Cebu city kon ila na ba ni nga gipatuman sa mga supermarket? Kon wala pa, pagmata na intawon mo!