A certain sadness
Gisundan kog tan-aw si Paul nga klarong nagpamahid sa iyang mga luha sa iyang tudlo. Nakapanghupaw ko. Tungod sa frustrations niya sa gugma, hangtod ako iyang gipasinganlan nga nakahimo og kadaot sa iyang kinabuhi. Nawala na kaniya ang among panagsuod.
Kaanugon gyud ni Paul. Hilom kong nakaingon. Gawas nga guwapo siya, bright pa gyud siya sa klase. Ug tungod sa gugma, wa na siya magtagad
sa iyang future.
“Siya ra man ang nagdala sa iyang kaugalingong pagbati, Regine. Siya unta ang labaw nga nakahibawo sa angay niyang buhaton aron di siya maapektohan pag-ayo sa mga kapakyasan niya sa gugma.”
Usa ka ahapon ana nagkakuyog mi si Myrna, suod namong amiga ni Paul, sa pagpaingon sa merkado. Misuroy man gud ko sa merkado sa lungsod kay mamalit kog sud-anon para sa among panihapon.
“Di man tingali nato siya mabasol, Myrna. Nuon, wa pa koy kasinatian anang gugma-gugma. Unsa ba gyud ning klaseha sa pagbati, Myr? Duna ka na may experience ani kay dugay na man mo sa imong uyab?”
“Yes, Regine. Dugay na ming nagkarelasyon sa akong uyab. Pero you know, di gyud ko makaingon nga kami na gyud forever bisan love namo ang usag usa. Duna man gud tay destiny aning kinabuhia.”
“Mao ba? Ako nuon, wa pa maghunahuna anang destiny nga imong giingon kay wa pa man koy uyab. Aw, duna nuoy mga nangulitawo nako pero wa man ko nagustohan nila.”
“Moabot ra ang panahon nga makauyab ka, Regine. Ug anang higayona matubag mo ang imong gustong mahibaw-an bahin sa love. Si Paul wa makakontrol sa iyang gibati. Ug mao kini ang likayi kon makigrelasyon ka nag laki.” “Ingon diay ana, Myrna?” “Oo, Regine. Kon ihatag nato ang tanang paghigugma ngadto sa atong uyab, puwerteng sakita ang atong bation kon kapakyasan ang moabot nato aning pagbatia. Yes, mahigugma ta pero magbilin sab tag pagmahal para sa atong kaugalingon.”
Nakapanglingo ko. Mao tingali nga nahimong miserable ang kinabuhi ni Paul karon kay gitingob niya ang tanang paghigugma ngadto sa babaye nga iyag gikarelasyon.
(SUMPAYAN)