57 GIPANGKIHA TUNGOD SA SAP 'ANOMALY'
Moabot sa 57 ka mga tawo ang napasakaan nag kaso sa Criminal Investigation and Detection Group (CIDG) 7, ang 37 kanila mga opisyal sa gobyerno, nga naglakip sa mga barangay kapitan ug konsehal.
Ang 20 mga sakop sa panimalay nga di unta angay nga modawat, apan giapil sa paglista sa barangay kay giingong mga kabanay ra.
Kini nunot sa giingong anomaliya sa pagpang apud-apud sa Social Amelioration Program (SAP) fund sa Department of Social Welfare and Development (DSWD) nga alang sa mga kabus nga labihang naapektuhan sa enhanced community quarantine (ECQ).
Ang mga barangay kapitan nagagagikan sa Bohol, diin dunay usa; upat sa Probinsya sa Sugbo; usa sa Negros Oriental; tulo sa Dakbayan sa Sugbo; tag usa sa Mandaue City ug Lapu-Lapu.
Matod ni Police Major Ronald Alan Tolosa, deputy regional chief sa CIDG 7, nga ang mga barangay official nakalapas sa Bayanihan to Heal as One Act, Anti Graft and Corrupt Practices Act ug Code of Conduct and Ethical Standards of Public Officials.
Aduna pay 19 nga pending nga naa pa sa mga imbestigador sa CIDG 7 nga gitakdang pasakaan usab og kaso.
Dunay laing 11 usab ang gipaubos pa sa case build up nga gipangitaan pa og mga ebidensya.
Dugang ni Tolosa nga kasagaran sa reklamo nga miabot sa ilang buhatan mao ang di patas nga pagpanghatag sa ayuda.
Kasagaran sa nahatagan mao kadtong di kabus samtang ang tinuod nga maoy tabanganan wa na hinuon makadawat sa ayuda.
“Ang kasagaran nga reklamo ani is unang una, kining distribution ngadto sa unqualified beneficiaries diin aduna poy mga cases ani kon diin instead nga makadawat silag P6,000, ang nadawat nila is only P4,000,” sigun ni Tolosa.
Gawas sa 12 ka mga barangay kapitan, giapil pagkiha ang upat ka barangay konsehal, usa ka barangay secretary, pito ka barangay health workers, tulo ka social workers, lima ka coordinators ug lima ka enumerators.
Gipasakaan usab og kasong perjury ang 20 ka civilians nga di unta kwalipikado, apan nakadawat og ayuda human masuta nga kaila ra usab sa barangay officials.
Gipasabot ni Tolosa nga sa di pa makadawat ang usa ka lumolupyo kinahanglan nga manumpa kini nga siya kabus sa tanang kabus. /